Suqa parlamentdən dəstək aldı
Yaponiya parlamentinin aşağı palatası sentyabrın 16-da hakim Liberal Demokrat Partiyasının sədri Yoşihide Suqanı baş nazir postuna təsdiqləyib. Novator.az-ın məlumatına görə, hökumət başçısı 462 deputatdan 314-nün dəstəyini alıb.
Əvvəlki baş nazir Sindzo Abe səhhətindəki problemləri əsas gətirərək avqustun 28-də istefa verib, həmçinin Liberal Demokrat Partiyasının sədri postundan ayrılıb.
Sentyabrın 14-də Yoşihide Suqa Liberal Demokrat Partiyasının sədr seçilərək baş nazirliyə namizəd statusu alıb.
1948-ci il təvəllüdlü Yoşihide Suqa Yaponiya parlamentinin aşağı palatasına ilk dəfə 1996-cı ildə seçilib. 2006-2007-ci illərdə daxili işlər və kommunikasiya naziri olub, 2012-ci ildən Nazirlər Kabinetinin baş katibi vəzifəsini tutub.
Yaponiyada dövlət başçısı kürsüsündə imperator Naruhito əyləşir. Hökumət parlament seçkisinin nəticələri əsasında formalaşır. 2012, 2014, 2017-ci illərin parlament seçkilərində Liberal Demokrat Partiyası və müttəfiqləri qalib gəlib.
