İxracın 88,3 faizi neft-qazdır
Dövlət Gömrük Komitəsi səkkiz aylıq xarici ticarət hesabatı yayıb. Novator.az bildirir ki, rəsmi statistikaya görə, 2020-ci ilin yanvar-avqust aylarında Azərbaycanın xarici ticarət əməliyyatlarının həcmi 16 milyard 570,6 milyon dollar olub, 9 milyard 880,1 milyon dollarlıq ixrac, 6 milyard 690,5 milyon dollarlıq idxal qeydə alınıb.
175 ölkə ilə ticarət əməliyyatı aparıldığı, gömrük orqanlarının büdcəyə 2 milyard 645,3 milyon manat vəsait ödədiyi vurğulanır.
Açıqlamaya əsasən, ixracın 8,9 faizi MDB ölkələrinin, 48,7 faizi Avropa İttifaqı ölkələrinin, 42,4 faizi başqa ölkələrin payına düşüb.
İdxalda MDB-nin payı 26,1 faiz, Avropa İttifaqının payı 21,4 faiz, başqa ölkələrin payı 52,5 faiz göstərilir.
Səkkiz ayda əsas tərəfdaş İtaliya olub, bu ölkə ilə ticarət ümumi dövriyyənin 20,2 faizi həcmində rəsmiləşib.
İxracda əsas ölkə İtaliya (31,1 faiz), idxalda Rusiyadır (18,6 faiz).
Hesabata görə, ixracın 88,3 faizi neft-qaz, 3,8 faizi meyvə-tərəvəzdir.
İdxalın 15,3 faizi yeyinti məhsulları kimi rəsmiləşib.
