Yerli seçkilərdə hakim partiya önə çıxıb
Rusiyada yerli seçkilərə yekun vurulub. Novator.az-ın məlumatına görə, 11-13 sentyabrı əhatə edən səsvermələrdə həmçinin bəzi federasiya subyektlərinin başçıları və yerli qanunverici orqanların deputatları müəyyənləşib, dörd bölgədə ölkə parlamentinin aşağı palatasına əlavə seçkilər olub.
İlkin nəticələrə əsasən, hakim Vahid Rusiya Partiyası 12 bölgədə başçı postuna sahib çıxıb, 5 bölgədə müstəqil namizədlər, 1 bölgədə Liberal Demokrat Partiyasının təmsilçisi üstün gəlib.
Vahid Rusiya Partiyasına Təhlükəsizlik Şurası sədrinin müavini Dmitri Medvedyev sədrlik edir. 1965-ci il təvəllüdlü Dmitri Medvedyev 2005-ci ilin noyabrından Rusiya baş nazirinin birinci müavini olub, daha sonra baş nazir kürsüsünə gətirilib. 2008-2012-ci illərdə Rusiya prezidenti postunu tutub, 2012-ci ildən yenidən baş nazir olub. İndiki vəzifəsində 2020-ci il yanvarın 16-dan çalışır.
Onun sədrlik etdiyi Vahid Rusiya Partiyası Rusiya parlamentinin 450 yerlik aşağı palatasında – Dövlət Dumasında 338 mandata sahibdir.
