Yaponiya hökumətinə yeni başçı gəlir
Sentyabrın 14-ü Yaponiyada hakim Liberal Demokrat Partiyasına yeni sədr seçilib: Yoşihide Suqa. Novator.az-ın məlumatına görə, Yoşihide Suqa Nazirlər Kabinetinin baş katibidir. Hakim partiyaya sədr seçilməklə Yoşihide Suqa baş nazir kürsüsünə namizəd statusu alıb.
Liberal Demokrat Partiyasının əvvəlki lideri Sindzo Abe avqustun 28-də baş nazir vəzifəsindən istefa verib. Sindzo Abe 2006-cı ildən Liberal Demokrat Partiyasının sədri idi. O, 2006-2007-ci illərdə hökumətə başçılıq edib, 2012-ci ildən yenidən baş nazir olub. 2012, 2014, 2017-ci illərin parlament seçkilərində Liberal Demokrat Partiyası və müttəfiqləri qalib gəlib.
Yaponiya parlamentində yeni baş nazir seçkisi sentyabrın 16-da keçiriləcək.
1948-ci il təvəllüdlü Yoşihide Suqa Yaponiya parlamentinin aşağı palatasına ilk dəfə 1996-cı ildə seçilib. 2006-2007-ci illərdə daxili işlər və kommunikasiya naziri olub. Nazirlər Kabinetinin baş katibi vəzifəsini 2012-ci ildən tutur.
