Orta maaş, sənaye və sərmayə göstəriciləri
Dövlət Statistika Komitəsi yeni göstəricilər açıqlayıb. Novator.az bildirir ki, rəsmi hesabata görə, 2020-ci il avqustun 1-nə Azərbaycan iqtisadiyyatında muzdla çalışanların sayı 1 milyon 681,2 min nəfər olub, onların 909,8 min nəfəri dövlət sektorunda, 771,4 min nəfəri qeyri-dövlət sektorunda fəaliyyət göstərib.
Muzdla işləyənlərin orta aylıq nominal əməkhaqqı 715,4 manat göstərilir.
Başqa bir açıqlamaya əsasən, ölkənin sənaye müəssisələri və bu sahədə fəaliyyət göstərən fərdi sahibkarlar yanvar-avqust aylarında 24,7 milyard manatlıq, 2019-cu ilin eyni dövrü ilə müqayisədə 3,1 faiz az sənaye məhsulu istehsal edib: “Azalma neft-qaz sektorunda məhsul istehsalının 4,9 faiz düşməsi hesabına baş verib, sənayenin qeyri neft-qaz sektorunda məhsul istehsalı 13,6 faiz artıb”.
Dövlət Statistika Komitəsi həmçinin bildirir ki, yanvar-avqust aylarında əsas kapitala 8 milyard 682,4 milyon manat məbləğində, 2019-cu ilin eyni dövrü ilə müqayisədə 0,7 faiz çox vəsait yönəldilib. Neft-qaz sektoruna yatırılmış investisiyaların həcminin 19 faiz artdığı, qeyri neft-qaz sektoruna yönəldilən vəsaitin həcminin 10,5 faiz azaldığı vurğulanır.
