Ticarət statistikası
2020-ci ilin yanvar-avqust aylarında Azərbaycanın pərakəndə ticarət şəbəkəsində 13,3 milyard manatlıq ərzaq məhsulları, içkilər və tütün məmulatları, 11,3 milyard manatlıq qeyri-ərzaq malları satılıb. Novator.az bildirir ki, Dövlət Statistika Komitəsinin hesabatına görə, 2019-cu ilin səkkiz ayı ilə müqayisədə pərakəndə ticarət dövriyyəsi real ifadədə 1,8 faiz, o cümlədən qeyri-ərzaq malları üzrə 6,9 faiz azalıb, ərzaq məhsulları, içkilər və tütün məmulatları üzrə 3,3 faiz artıb.
Əhalinin bir nəfərinə düşən orta aylıq pərakəndə ticarət dövriyyəsi 308,1 manat göstərilir.
Başqa bir rəsmi hesabata əsasən, yanvar-iyul aylarında Azərbaycanın hüquqi və fiziki şəxsləri 172 ölkədəki tərəfdaşları ilə ticarət əməliyyatları həyata keçirib, 13,8 milyard dollara yaxın xarici ticarət dövriyyəsinin 57,2 faizi ixracın, 42,8 faizi idxalın payına düşüb.
2019-cu ilin yanvar-iyul ayları ilə müqayisədə xarici ticarət dövriyyəsinin faktiki qiymətlərlə 30,9 faiz, real ifadədə 22,5 faiz, o cümlədən idxalın 43,4 faiz, ixracın 7,1 faiz azaldığı vurğulanır.
