Vəkil Tofiqdən xəbər gətirib
Vəkil Aqil Layıc sentyabrın 7-də məhbus siyasətçi Tofiq Yaqublu ilə görüşüb.
Tofiq Yaqublu Bakının Şüvəlan qəsəbəsindəki 3 saylı İstintaq Təcridxanasında saxlanır. O, sentyabrın 2-dən aclıq aksiyası keçirir.
Novator.az-ın məlumatına görə, Aqil Layıc yazır ki, Tofiq Yaqublu təcridxanada onunla görüşə çox gec gəlib çıxıb: “Halı yox idi, rəngi solmuşdu, əvvəlki tək yerimirdi, gözləri çuxura düşmüşdü. Deyir ki, çəkisi 91 kilodan 82 kiloya düşüb. Aclığın 6-cı günüdür.
Müəssisə rəisinin müavini və psixoloq Tofiq bəyin yanına gəlib psixoloji durumuna görə akt tərtib etmək istəyirlərmiş. Sanki o, aclığı psixoloji vəziyyətinə görə edirmiş. Amma Tofiq bəy psixoloji halının çox normal olduğunu qeyd edib, aclıq aksiyasını psixoloji durumuna görə deyil, ədalətsizliyə qarşı etdiyini bildirib”.
Sentyabrın 7-də Tofiq Yaqubluya ombudsman Səbinə Əliyeva da baş çəkib. Rəsmi məlumata görə, Tofiq Yaqublu ombudsmana barəsində olan cinayət işi və məhkəmə qərarından narazılığını əsas göstərərək aclıq etdiyini deyib. Müəssisə və tibbi-sanitar hissə rəhbərliyinə Tofiq Yaqublunun səhhətinin həkim nəzarətində saxlanması məqsədilə tövsiyələr verilib.
Siyasətçi bu il martın 22-də tutulub. İttihama əsasən, Tofiq Yaqublu həmin gün idarə etdiyi avtomobillə Bakının Nizami rayonunda qaydaları pozub, Elxan Cəbrayılovun idarə etdiyi avtomobillə toqquşub.
Tofiq Yaqublunun mübahisə zəminində Elxan Cəbrayılovu yumruqla və vintaçan alətlə zərbələr vurub xəsarətlər yetirdiyi, onun avtomobildə olan yoldaşı Cəvahir Cəbrayılovanı əli ilə itələyib xəsarət yetirdiyi bəyan olunub.
Məhbus siyasətçi ittihamı qəbul etmir, bildirir ki, Elxan Cəbrayılovun maşını əvvəldən həmin ərazidə dayanıb gözləyib, işarədən sonra qəfildən onun dayanmış avtomobilinə tərəf hərəkət edərək qəza törədib, sonra dava salıb. Onun sözlərinə görə, hadisənin təxribat olduğunu anladığı üçün maşınının qapısını kilidləyib, şüşəni qaldırıb və polis gəlməyənə kimi yerə düşməyib, heç kimi vurmayıb.
İbtidai istintaqı Nizami Rayon Polis İdarəsi aparıb.
Sentyabrın 3-də Nizami Rayon Məhkəməsində Tofiq Yaqubluya 4 il 3 ay müddətinə azadlıqdan məhrumetmə cəzası kəsilib. O, silah qismində istifadə olunan əşyalardan istifadə etməklə xuliqanlıqda təqsirli bilinib.
Tofiq Yaqubluya çıxarılmış hökmdən apellyasiya şikayəti verilib. Bakı Apellyasiya Məhkəməsinə ünvanlanan şikayətdə Tofiq Yaqubluya bəraət istənir, azadlığa buraxılması tələb edilir.
1961-ci il təvəllüdlü Tofiq Yaqublu milli azadlıq hərəkatının (1988-1991) fəalı, Qarabağ müharibəsi veteranıdır. Əbülfəz Elçibəyin prezidentliyi dövründə (1992-1993) Binəqədi Rayon İcra Hakimiyyəti başçısının birinci müavini vəzifəsində çalışıb. 1992-ci ildən Müsavat Partiyasının üzvüdür. 2010-2018-ci illərdə partiya başqanının müavini postunu tutub.
Demokratik Qüvvələrin Milli Şurasının rəhbərliyində təmsil olunur.
2013-cü il fevralın 4-dən 2016-cı il martın 17-dək həbsdə yatıb.
Tofiq Yaqublunun qızı, müsavatçı Nigar Həzi 2012-2013-cü illərdə, onun həyat yoldaşı, AXCP sədrinin müavini Seymur Həzi 2014-2019-cu illərdə həbsdə olub.
Tofiq Yaqublunun digər qızı, müsavatçı Nərgiz Yaqublu 2015-ci ilin aprel ayında, atası həbsdə olan vaxt vəfat edib.
Məhbus siyasətçinin oğlu Rəhim Yaqublu hərbi xidmətdədir.
Tofiq Yaqublu yenə həbsə gedir
Tofiq Yaqublunun məhkəməsi qapalı keçiriləcək
Ev dustaqlığına da yox deyildi
Tofiq Yaqublu nədən narazıdır?
Məhkəmənin Tofiq qərarı dəyişməz qaldı
Həbsin uzadılması: şikayət təmin olunmadı
Tofiq Yaqublu məhkəməni səbirsizliklə gözləyir
Tofiqin mühakiməsi “yox”larla başladı
Tofiq Yaqublu: “Mən əsir götürülmüş şəxsəm”
“Yalan danışıb qapını bağlayırsan, sonra da deyirsən…”
Tofiqin əsgər oğlunun problemi var
Üç vəsatətdən biri təmin olundu
