Rəşad Abbaslıya 30 sutka kəsildi
Haqq-Ədalət Partiyası sədrinin köməkçisi, qurumun İdarə Heyətinin üzvü Rəşad Abbaslıya 30 sutka inzibati həbs cəzası verilib. O, polis işçisinin qanuni tələbinə qəsdən tabe olmamaqda təqsirli bilinib. Qərarı sentyabrın 7-də Binəqədi Rayon Məhkəməsi çıxarıb.
Novator.az bildirir ki, Rəşad Abbaslını sentyabrın 5-i Bakıda, yaşadığı evin həyətində mülki geyimli şəxslər tutub. Sentyabrın 7-də onun Binəqədi Rayon Polis İdarəsinin 5-ci bölməsində saxlandığı bəlli olub.
Rəşad Abbaslı ali təhsilli mühəndis, 3 azyaşlı uşaq atası, Füzuli rayonundan məcburi köçkündür.
Haqq-Ədalət Partiyası 2019-cu il noyabrın 24-də elan olunub. 2020-ci il yanvarın 25-i Bakıda təsis konfransı keçirilib, sabiq səhiyyə naziri Əli İnsanov sədr seçilib.
1946-cı il təvəllüdlü Əli İnsanov hakim Yeni Azərbaycan Partiyasının qurucularındandır. Səhiyyə naziri vəzifəsində 1993-2005-ci illərdə çalışıb. 1995-2000-ci illərdə Milli Məclisin deputatı olub. Tibb elmləri doktorudur.
2005-ci ilin oktyabr ayından 2019-cu il martın 17-dək həbsdə yatıb.
