İnsan hüquqları üzrə müvəkkil (ombudsman) Səbinə Əliyeva bir qrup abituriyentin müraciəti əsasında Dövlət İmtahan Mərkəzinə üz tutub. Rəsmi məlumata görə, məktubda koronavirus pandemiyası ilə bağlı karantin rejimi çərçivəsində məktəblərin bağlanmasının, qrup halında məşğələlərin məhdudlaşdırılmasının, onlayn dərslərə qoşulmaqda problemlərin, imtahan vaxtlarının dəyişdirilməsinin abituriyentlərin imtahanlarda yüksək bal toplamasına əngəl törətdiyi qeyd olunur. Səbinə Əliyeva  epidemiyanın geniş yayılmasının qarşısını almaq üçün görülən tədbirlərin normal həyat şərtlərini dəyişməsini, 2020-ci ilin məzunlarının əvvəlki illərin abituriyentləri ilə müqayisədə daha gərgin psixoloji vəziyyətdə olmasını nəzərə almağı, müsabiqə şərtlərini yumşaltmağı təklif edir.

Azərbaycanın bütün təhsil ocaqları martın 3-dən qapadılıb.

Nazirlər Kabinetinin qərarına görə, bütün təhsil müəssisələrində tədris və təlim-tərbiyə prosesi bu tarixlərdən əyani formada təşkil ediləcək:

məktəbəqədər təhsil müəssisələrində – sentyabrın 15-dən;

ümumi təhsilin ibtidai təhsil səviyyəsi (I-IV siniflər) üzrə – sentyabrın 15-dən;

xüsusi məktəblərdə, xüsusi internat məktəblərində, ümumtəhsil internat məktəblərində, inteqrasiya təlimli internat tipli təhsil müəssisələrində, inteqrasiya təlimli internat tipli gimnaziyalarda, valideyn himayəsindən məhrum uşaqlar üçün ümumtəhsil internat məktəblərində – sentyabrın 15-dən;

ümumi təhsilin məktəbəhazırlıq mərhələsi (5 yaş) üzrə – oktyabrın 1-dən;

ümumi təhsilin ümumi orta təhsil səviyyəsi (V-IX siniflər) üzrə – oktyabrın 1-dən;

ümumi təhsilin tam orta təhsili səviyyəsi (X-XI siniflər) üzrə – oktyabrın 15-dən;

peşə təhsili müəssisələrində qısamüddətli kurslar üzrə – oktyabrın 1-dən;

peşə təhsilinin bütün səviyyələri üzrə – oktyabrın 15-dən;

ali və orta ixtisas təhsili müəssisələrində I kurs tələbələri üçün – oktyabrın 1-dən;

II və yuxarı kurs tələbələri üçün siyahısı Təhsil Nazirliyi ilə razılaşdırılmaqla və hər bir ixtisasın xüsusiyyəti nəzərə alınmaqla təhsil müəssisələrinin müəyyən etdiyi ixtisaslar üzrə – oktyabrın 15-dən;

uşaq musiqi, incəsənət və rəssamlıq məktəblərində yaş qruplarından və siniflərindən asılı olaraq – sentyabrın 15-dən, oktyabrın 1-dən və ya 15-dən.