Sentyabrın 4-də fərman imzalayan prezident İlham Əliyev Təhsil Nazirliyinin əsasnaməsini yeniləyib. Novator.az bildirir ki, dəyişikliyə görə, nazirliyin saxlanması xərcləri və fəaliyyəti yalnız dövlət büdcəsi hesabına deyil, həmçinin qanunla nəzərdə tutulan digər mənbələr hesabına maliyyələşdirilir.

Nazirin səlahiyyətləri artır, ona nazirliyə aid edilmiş məsələlər üzrə müvafiq il üçün dövlət büdcəsinin və büdcədənkənar fondların formalaşdırılması ilə bağlı təkliflər vermək; dövlət büdcəsindən ayrılan vəsaitin, büdcədənkənar xüsusi vəsaitin sərəncamçısı olmaqla maliyyə vəsaitini bölüşdürmək, ayrılmış vəsaitin həddi nəzərə alınmaqla işçilərin vəzifə maaşlarına əlavələrin, maddi yardım və mükafatların verilməsini təmin etmək həvalə olunur.

Azərbaycan Xalq Cümhuriyyəti hökumətinin 28 may 1918-ci il qərarı ilə Xalq Maarifi Nazirliyi yaradılıb.

28 aprel 1920-ci ildə Xalq Maarifi Komissarlığı adı ilə yenidən təşkil edilib.

1959-cu ildən 1988-ci ilədək Azərbaycanda təhsillə bağlı iki nazirlik və bir komitə (Xalq Maarifi Nazirliyi, Ali və Orta İxtisas Təhsili Nazirliyi, Dövlət Texniki Peşə Təhsili Komitəsi) fəaliyyət göstərib.

1988-ci ildə Xalq Təhsili Nazirliyi yaradılıb.

1993-cü ildə qurum Ali Təhsil və Maarif nazirliklərinə bölünüb. Həmin il sentyabrın 3-də Təhsil Nazirliyi yaradılıb.

2020-ci il iyulun 27-dən təhsil naziri vəzifəsini Emin Əmrullayev tutur.

Emin Əmrullayev 1982-ci ildə doğulub. 2013-2014-cü illərdə Təhsil Nazirliyində keyfiyyətin təminatı sektorunun müdiri, 2014-2020-ci illərdə təhsilin inkişafı proqramları şöbəsinin müdiri vəzifələrində çalışıb. 2020-ci ilin yanvar ayından Təhsil İnstitutunun direktoru vəzifəsini yerinə yetirib.