“Neftçi”yə yeni mümkün rəqiblər
UEFA Avropa Liqasının 2020-2021 mövsümündə yer alan Azərbaycan təmsilçisi “Neftçi” ikinci mərhələdə (17 sentyabr) Türkiyənin “Qalatasaray” komandasını qəbul edəcək.
Bakılılar birinci mərhələdə evdə Şimali Makedoniyanın “Şkupi” komandasını ələyib (2:1).
Novator.az bildirir ki, sentyabrın 1-də üçüncü mərhələnin (24 sentyabr) püşkü atılıb. “Neftçi” ikinci raundu keçəcəyi halda Bakıda “Renova” (Şimali Makedoniya) – “Hayduk” (Xorvatiya) cütlüyünün qalibi ilə oynayacaq.
1937-ci ildə yaradılmış “Neftçi” komandası üst-üstə 27 il SSRİ çempionatının güclülər dəstəsində yarışıb, 1966-cı ildə bürünc medallara sahib olub.
Komanda 1992-ci ildən keçirilən Azərbaycan milli çempionatını 8 dəfə zirvədə başa vurub. 2012-2013 mövsümündə Avropa Liqasının qrup mərhələsində çıxış edib.
