Manatın dollar xərci 5 milyardı keçdi
Dövlət Neft Fondu Mərkəzi Bankın avqust ayında keçirdiyi valyuta hərraclarında 478 milyon ABŞ dolları məbləğində vəsait satıb. Rəsmi hesabat sentyabrın 1-də yayılıb.
Novator.az bildirir ki, 2020-ci ilin yanvar-avqust aylarının hərraclarında fonddan 5 milyard 3,7 milyon ABŞ dolları məbləğində vəsait alınıb. Yanvarın hərraclarında fond 300,2 milyon dollar, fevralın hərraclarında 543,4 milyon dollar, martın hərraclarında 1 milyard 928,3 milyon dollar, aprelin hərraclarında 531,1 milyon dollar, mayın hərraclarında 334 milyon dollar, iyunun hərraclarında 373,2 milyon dollar, iyulun hərraclarında 515,5 milyon dollar sərf edib.
2016-cı ildə Dövlət Neft Fondunun analoji xərci 4,9 milyard dollar, 2017-ci ildə 3,6 milyard dollar, 2018-ci ildə 6,5 milyard dollar, 2019-cu ildə 6,6 milyard dollar göstərilib.
2015-ci ilin iki devalvasiyası nəticəsində dolların məzənnəsi 0,7844 manatdan 1,5594 manata yüksəlib.
2016-cı ildə rəsmi qiymət 1,7707 manata çatıb.
2017-ci ilin fevralında maksimal qiymət qeydə alınıb: 1,92 manat. Həmin ili 1,7001 manatla yola salan dollar 2018-ci il martın 7-dən banklara 1,7 manata təklif olunur.
