“Qalatasaray” Bakıya gəlir
UEFA Avropa Liqasının 2020-2021 mövsümündə yer alan Azərbaycan təmsilçisi “Neftçi”nin ikinci mərhələdəki (17 sentyabr) rəqibi bəlli olub. Novator.az bildirir ki, avqustun 31-də atılan püşkün nəticəsinə görə, bakılılar Türkiyənin “Qalatasaray” komandasını qəbul edəcək.
1905-ci ildə yaradılan “Qalatasaray” 22 dəfə Türkiyə çempionu olub, 2000-ci ildə o vaxt UEFA kuboku adlanan Avropa Liqasında zəfər qazanıb.
Bakılılar birinci mərhələdə evdə Şimali Makedoniyanın “Şkupi” komandasını ələyib (2:1).
1937-ci ildə yaradılmış “Neftçi” komandası üst-üstə 27 il SSRİ çempionatının güclülər dəstəsində yarışıb, 1966-cı ildə bürünc medallara sahib olub.
Komanda 1992-ci ildən keçirilən Azərbaycan milli çempionatını 8 dəfə zirvədə başa vurub. 2012-2013 mövsümündə Avropa Liqasının qrup mərhələsində çıxış edib.
