Avqustun 31-də fərman imzalayan prezident İlham Əliyev Dövlət Neft Fondunun 2020-ci il büdcəsini yeniləyib. Novator.az-ın məlumatına görə, fondun gəlirləri 7,8 milyard manata düşür, xərcləri 12,4 milyard manata yüksəlir.

2020-ci ildə fondun gəlirləri 12,4 milyard manat, xərcləri 11,6 milyard manat olmalı idi.

Yenilənmiş xərc istiqamətləri belədir: 2020-ci ilin dövlət büdcəsinə transfert – 12 milyard 200 milyon manat; məcburi köçkünlərin sosial-məişət və məskunlaşma məsələləri ilə bağlı tədbirlərin maliyyələşdirilməsi – 200 milyon manat; 2019-2023-cü illərdə ali təhsil sisteminin beynəlxalq rəqabətliliyinin artırılması üzrə dövlət proqramının maliyyələşdirilməsi – 10 milyon manat; fondun idarə edilməsi ilə bağlı xərclər – 29 milyon 910,3 min manat.

2020-ci ilin yenilənən dövlət büdcəsində bir barrel neftin qiyməti 35 dollardır. Novator.az bildirir ki, Azərbaycan nefti “AzəriLayt” yanvara 70,04, fevrala 62,15, marta 53,77, aprelə 19,43, maya 22,92, iyuna 38,14, iyula 43,02, avqusta 44,36 dollarla başlayıb.

Xam neft hasilatı yanvarda 678 min barrel, fevralda 667,4 min barrel, martda 683,7 min barrel, apreldə 679,8 min barrel, mayda 557,2 min barrel, iyunda 553,8 min barrel, iyulda 554,1 min barrel həcmində rəsmiləşib.

2020-ci ilin yanvar-iyul aylarında Azərbaycanda 20,5 milyon ton neft (kondensatla birlikdə) çıxarılıb, hasilat 2019-cu ilin yeddi ayı ilə müqayisədə təxminən 1,4 milyon ton azalıb. Yeddi ayda 16,9 milyon ton neft ixrac olunub, bu da 2019-cu ilin yanvar-iyul aylarına nəzərən 7,6 faiz aşağı göstəricidir.