İxrac icmalı açıqlanıb
İqtisadi İslahatların Təhlili və Kommunikasiya Mərkəzi yeni ixrac icmalı yayıb. Hesabata görə, 2020-ci ilin yanvar-iyul aylarında Azərbaycanın ixracı 9,1 milyard dollar olub.
Qeyri-neft sektoru üzrə 1 milyard 35 milyon dollar dəyərində ixrac qeydə alındığı, bu sektorda ixracın ötən ilin yeddi ayı ilə müqayisədə 8,6 faiz azaldığı bildirilir.
Statistikaya əsasən, yanvar-iyul aylarında Rusiyaya 418,6 milyon, Türkiyəyə 205 milyon, İsveçrəyə 107,6 milyon, Gürcüstana 84,2 milyon, Çinə 31,7 milyon dollar dəyərində qeyri-neft sektoruna aid mal ixrac olunub. İxrac edilən malların siyahısında pomidor birinci (166,5 milyon dollar), sikkə kəsilməsində istifadə olunmayan, digər emal olunmamış formalarda qızıl ikinci (96,5 milyon dollar), pambıq mahlıcı üçüncü (70,6 milyon dollar) yerdə göstərilir.
İqtisadi İslahatların Təhlili və Kommunikasiya Mərkəzi 2016-cı ildə yaradılıb. Nizamnaməsinə görə, mərkəzin əsas missiyası təhlil və tədqiqatlar aparmaqla iqtisadi islahatların həyata keçirilməsi üçün təkliflər, habelə orta və uzun müddətli dövr üçün proqnozlar hazırlamaq, dövlət orqanlarını və qurumlarını həmin proqnozlarla təmin etməkdir.
Qurumun icraçı direktoru postunu Vüsal Qasımlı tutur.
Novator.az bildirir ki, Dövlət Gömrük Komitəsinin hesabatına görə, 2020-ci ilin yanvar-iyul aylarında Azərbaycanın xarici ticarət əməliyyatlarının həcmi 15 milyard dolları ötüb, 9,1 milyard dollardan çox ixrac, 6 milyard dollara yaxın idxal qeydə alınıb.
İxracın 88,6 faizi neft-qaz, 3,9 faizi meyvə-tərəvəz kimi rəsmiləşib.
