Bakıda Norveç sınağı
Avqustun 31-də UEFA Çempionlar Liqasının 2020-2021 mövsümünün üçüncü mərhələsinin (15-16 sentyabr) püşkü atılıb. Novator.az-ın məlumatına görə, Azərbaycan təmsilçisi “Qarabağ”a Norveçdən “Molde” qismət olub. Oyun Bakıya salınıb.
1911-ci ildə yaradılmış “Molde” klubu dördqat Norveç çempionudur, dörd dəfə də ölkə kubokunu əldə edib.
“Qarabağ” birinci mərhələdə Şimali Makedoniyanın “Sileks” komandasını (4:0), ikinci mərhələdə Moldovanın “Şerif” klubunu (2:1) yenib. Hər iki oyun Bakıda keçirilib.
Ələmələrdə yalnız dördüncü mərhələ cüt oyunlardan ibarətdir. Həmin mərhələdən turnirə Avstriyadan “Zalsburq”, Çexiyadan “Slaviya”, Yunanıstandan “Olimpiakos” qoşulur.
Qrup mərhələsində bu komandalar var: İspaniyadan “Real”, “Barselona”, “Atletiko”, “Sevilya”; İngiltərədən “Liverpul”, “Mançester Siti”, “Mançester Yunayted”, “Çelsi”; İtaliyadan “Yuventus”, “İnter”, “Atalanta”, “Latsio”; Almaniyadan “Bavariya”, “Borussiya” (Dortmund), “Leypsiq”, “Borussiya” (Mönhenqladbah); Fransadan PSJ, “Marsel”, “Renn”; Rusiyadan “Zenit”, “Lokomotiv” (Moskva); Portuqaliyadan “Portu”, Belçikadan “Brügge”, Ukraynadan “Şaxtyor”, Türkiyədən “Başakşəhər”, Niderlanddan “Ayaks”.
“Qarabağ” komandasının əsası 1951-ci ildə Ağdam şəhərində qoyulub. 1977-ci ilədək komanda “Məhsul”, 1982-ci ilədək “Şəfəq”, 1988-ci ilədək “Kooperator” adı daşıyıb. 1 dəfə Azərbaycan SSR-in, 8 dəfə müstəqil Azərbaycanın çempionu olub.
Komanda 2014-2015, 2015-2016, 2016-2017, 2018-2019, 2019-2020 mövsümlərində Avropa Liqasının qrup mərhələsində, 2017-2018 mövsümündə Çempionlar Liqasının qrup mərhələsində oynayıb.
