Yarpaq tökümü
2020-2021 mövsümündə UEFA-nın klub turnirlərinə 237 komanda buraxılıb. Novator.az-ın məlumatına görə, Çempionlar Liqasına vəsiqə almış 79 komandadan 33-ü ilkin, birinci və ikinci mərhələlərdə ələnərək Avropa Liqasına köç edib.
158 komandanın bilet aldığı Avropa Liqasında ilkin və birinci mərhələlər arxada qalıb. Avqustun 28-dək 53 komanda ələnib.
Lixtenşteyn təmsilçisiz qalıb, 55 UEFA üzvünün daha 30-u itki verib.
Azərbaycanın 4 komandasından 2-si mübarizəni davam etdirir. Çempionlar Liqasında yarışan “Qarabağ”ın üçüncü mərhələdə mümkün rəqibləri Norveçdən “Molde”, Danimarkadan “Midtülland”, Macarıstandan “Ferensvaroş”, Kiprdən “Omoniya”, Belarusdan “Dinamo”dur (Brest).
Avropa Liqasının ikinci raunduna çıxan “Neftçi”nin potensial rəqibləri arasında “Tottenhem” (İngiltərə), “Volfsburq” (Almaniya), “Qranada” (İspaniya), “Milan” (İtaliya), “Reyms” (Fransa), “Bazel” (İsveçrə), “Kopenhagen” (Danimarka), “Standard” (Belçika), “Reyncers” (Şotlandiya), “Rio Ave” (Portuqaliya), “Villem II” (Niderland), “Qalatasaray” (Türkiyə), “Slovan”, “Yablonets” (hər ikisi Çexiya), “Hayduk” (Xorvatiya), “Hartberq” (Avstriya), BATE (Belarus), “Dinamo” (Moskva, Rusiya), “Kolos” (Kovalyovka, Ukrayna) klubları var.
