Üçdən biri…
UEFA Avropa Liqasının 2020-2021 mövsümündə yer alan Azərbaycan təmsilçiləri avqustun 27-də birinci mərhələnin oyunlarını keçiriblər. Novator.az-ın məlumatına görə, Bakıda Şimali Makedoniyanın “Şkupi” komandasını qəbul edən “Neftçi” 2:1 hesabı ilə üstün gələrək növbəti raunda çıxıb.
“Sumqayıt” evdə Şimali Makedoniyanın “Şkendiya” komandasına 2 cavabsız topla yenilərək ələnib.
“Keşlə”nin Azərbaycan paytaxtında Albaniyanın “Laçi” klubu ilə görüşünün əsas və əlavə vaxtı qolsuz bitib. Penalti seriyasında 4:5 hesabı qeydə alınıb və albanlar mərhələ adlayıb.
“Neftçi” ikinci raundda tanınmış komandalarla üz-üzə gələ bilər. Həmin mərhələdən turnirə qoşulacaq komandalar arasında “Tottenhem” (İngiltərə), “Volfsburq” (Almaniya), “Qranada” (İspaniya), “Milan” (İtaliya), “Reyms” (Fransa) var.
“Bazel” (İsveçrə), “Kopenhagen” (Danimarka), “Standard” (Belçika), “Reyncers” (Şotlandiya), “Rio Ave” (Portuqaliya), “Villem II” (Niderland) klubları da ikinci raundda yer alırlar.
Mərhələnin digər komandaları bunlardır: “Qalatasaray” (Türkiyə), “Slovan”, “Yablonets” (hər ikisi Çexiya), “Hayduk” (Xorvatiya), “Hartberq” (Avstriya), BATE (Belarus), “Dinamo” (Moskva, Rusiya), “Kolos” (Kovalyovka, Ukrayna).
Püşk avqustun 31-də atılacaq.
