Baş Prokurorluq və Dövlət Təhlükəsizliyi Xidmətinin birgə məlumatına görə, avqustun 23-ü səhər saat 6 radələrində cəbhənin Goranboy rayonu istiqamətində Ermənistan Silahlı Qüvvələrinin diversiya-kəşfiyyat qrupunun komandiri, 1989-cu il təvəllüdlü baş leytenant Qurgen Alaverdyan tutulub. Ona təcavüzkar müharibəni aparma; casusluq; qanunvericiliklə nəzərdə tutulmayan silahlı birləşmələri və ya qrupları yaratma; qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə; Azərbaycanın dövlət sərhədini qanunsuz keçmə ittihamları ilə cinayət işi qaldırılıb.

İbtidai istintaqın aparılması üçün Baş Prokurorluq, Dövlət Təhlükəsizliyi Xidməti, Daxili İşlər Nazirliyi və Dövlət Sərhəd Xidmətinin birgə istintaq-əməliyyat qrupu yaradılıb, icraat Baş Prokurorluğun İstintaq İdarəsinə tapşırılıb.

1988-ci ildə Azərbaycanın Dağlıq Qarabağ vilayətində bölgənin Ermənistana verilməsi tələbi ilə separatçı hərəkat başlanıb və açıq hərbi təcavüzə çevrilib.

1991-ci ildə Dağlıq Qarabağ erməniləri bölgəni “müstəqil dövlət” elan edib, müharibə alovlanıb.

1994-cü ildə atəşkəslə dayanan işğalçı müharibədə Ermənistan Dağlıq Qarabağ bölgəsini (Xankəndi şəhəri, Şuşa, Xocalı, Xocavənd rayonları, keçmiş Ağdərə rayonu) və onun ətrafındakı bölgələri (Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonları) işğal edib.