Bakıda nə qədər maaş alırlar?
2020-ci ilin yanvar-iyul aylarında Azərbaycan paytaxtında sənaye istehsalı və xidmətlərinin həcmi ötən ilin eyni dövrü ilə müqayisədə 1,7 faiz azalaraq 17,2 milyard manat olub. Novator.az-ın məlumatına görə, hesabatı yayan Bakı Şəhər Statistika İdarəsi sənaye məhsulunun 74,5 faizinin mədən sahəsində istehsal olunduğunu bildirir, sənayedə qeyri-dövlət sektorunun payını 78,5 faiz göstərir.
Rəsmi açıqlamaya əsasən, yeddi ayda ticarət dövriyyəsinin həcmi 2019-cu ilin yanvar-iyul aylarına nəzərən 1,5 faiz, ictimai iaşə dövriyyəsi real ifadədə 55 faiz, əhaliyə göstərilən ödənişli xidmətlərin dəyəri real ifadədə 25,1 faiz geriləyib.
İyulun 1-nə muzdla işləyənlərin orta aylıq nominal əməkhaqqının 959,8 manata yüksəldiyi vurğulanır.
Dövlət Statistika Komitəsinin rəsmi hesabatına əsasən, 2020-ci il iyulun 1-nə Azərbaycanda muzdla işləyənlərin orta aylıq nominal əməkhaqqı 720 manat olub, neft-qaz sektorunda 3571 manat, qeyri neft-qaz sektorunda 657,9 manat, dövlət müəssisələrində 627 manat, özəl müəssisələrdə 839,8 manat məbləğində rəsmiləşib.
