Açılış
Prezident İlham Əliyev və birinci vitse-prezident Mehriban Əliyeva avqustun 26-da Bakının Xəzər rayonunun Buzovna qəsəbəsində yenidən qurulan 99 mənzildən ibarət yeddimərtəbəli yataqxana binasının açılışında iştirak ediblər.
Rəsmi arayışa görə, binadakı mənzillər 1, 2 və 3 otaqlıdır. Yataqxana binası “Azəriqaz” və “Bakqazmaş”ın qəzalı vəziyyətdə olan beşmərtəbəli yataqxanasının yerində inşa edilib. Heydər Əliyev Fondunun layihəsi ilə tikilən binada mənzillər tam təmirlidir və zəruri avadanlıqla təchiz olunub.
Xəzər rayonunun Qala qəsəbəsində yeni inşa olunan 216 nömrəli tam orta məktəbin, Suraxanı rayonundakı Səttar Bəhlulzadə adına Mədəniyyət Evinin açılışları da olub.
Avqustun 26-sı Mehriban Əliyevanın doğum günüdür.
1964-cü ildə Bakıda doğulan Mehriban Əliyeva 1-ci Moskva Dövlət Tibb İnstitutunu bitirib, Moskva Göz Xəstəlikləri Elmi-Tədqiqat İnstitutunda işləyib.
1995-ci ildən ictimai-siyasi fəaliyyətlə məşğul olur. Yeni Azərbaycan Partiyası sədrinin müavini, Heydər Əliyev Fondunun prezidentidir. 2005, 2010, 2015-ci illərdə Milli Məclisin deputatı seçilib.
2017-ci il fevralın 21-dən birinci vitse-prezidentdir.
