Gəncə əməliyyatı
Baş Prokurorluq Gəncə əməliyyatı barədə rəsmi məlumat yayıb. Qeyd olunur ki, Gəncənin Nizami Rayon İcra Hakimiyyətinin başçısı, Gəncə Şəhər İcra Hakimiyyətinin memarlıq və tikinti şöbəsinin müdiri vəzifələrində işləmiş Məharət Mustafayevlə əlaqədar çoxsaylı müraciətlər əsasında Korrupsiyaya Qarşı Mübarizə Baş İdarəsində cinayət işi başlanıb. Məharət Mustafayevin icra başçısı postu tutarkən Gəncə Şəhər İcra Hakimiyyətinin memarlıq və tikinti şöbəsinin müdiri Əli Rüstəmli və icra hakimiyyətinin digər vəzifəli şəxsləri vasitəsilə ayrı-ayrı adamlardan 194 min 300 manat məbləğində rüşvət aldığı, həmçinin vətəndaşa məxsus 175 min 500 manat məbləğində pulu mənimsədiyi bildirilir.
Açıqlamaya görə, Məharət Mustafayevin Gəncə Şəhər İcra Hakimiyyətinin memarlıq və tikinti şöbəsinin müdiri olarkən rəhbəri olduğu şöbənin mühəndisi vasitəsi ilə vətəndaşdan 9 min manat məbləğdə rüşvət almasına əsaslı şübhələr də müəyyən edilib: “Məharət Mustafayev, Əli Rüstəmli, eləcə də cinayətlərin törədilməsində vasitəçi qismində iştirak etmiş Razin Qəhrəmanov ağır nəticələrə səbəb olan vəzifə səlahiyyətlərindən sui-istifadə, qabaqcadan əlbir olan bir qrup şəxs və ya mütəşəkkil dəstənin külli miqdarda təkrar rüşvət alması, vəzifəli şəxsin bilə-bilə qanunsuz hərəkətlər (hərəkətsizlik) etməsinə görə ona rüşvət vermə və ya təkrar rüşvət verməyə təhrikçilik, öz qulluq mövqeyindən istifadə etməklə xeyli miqdarda ziyan vurmaqla təkrar dələduzluğa cəhd etmə və başqa ittihamlarla təqsirləndirilən şəxs qismində cəlb ediliblər. Avqustun 24-də Məharət Mustafayev və Əli Rüstəmli barəsində Binəqədi Rayon Məhkəməsinin qərarı ilə həbs, Razin Qəhrəmanov barəsində polisin nəzarəti altına vermə qətimkan tədbiri seçilib”.
