Narkotik cinayətləri 17,5 faiz artıb
Daxili İşlər Nazirliyinin hesabatına görə, 2020-ci ilin yanvar-iyun aylarında Azərbaycanda qeydə alınmış 13310 cinayətin 2904-ü narkotik vasitələrin və psixotrop maddələrin qanunsuz dövriyyəsi ilə əlaqədar olub, bu da ötən ilin ilk yarısına nəzərən 17,5 faiz çoxdur: “Cinayətlərin 57,8 faizi satış məqsədi olmadan narkotik vasitələri və ya psixotrop maddələri şəxsi istehlak miqdarından artıq miqdarda qanunsuz əldə etmə, saxlama, hazırlama, emal etmə, daşıma, 34,5 faizi eyni hərəkətləri satış məqsədilə etmə, habelə bu maddələri istehsal etmə, göndərmə, yaxud qanunsuz satma, 5,8 faizi tərkibində narkotik maddələr olan bitkiləri qanunsuz kultivasiya etmə, 1,7 faizi güclü təsir edən və ya zəhərli maddələrin satış məqsədilə qanunsuz dövriyyəsi, 0,2 faizi digər cinayətlərdir.
Yarım ildə narkotik vasitələrin və psixotrop maddələrin qanunsuz dövriyyəsi ilə bağlı 1921 nəfər cinayət törətmiş şəxs müəyyən edilib, onların 98,8 faizi cinayət məsuliyyətinə cəlb olunub.
Cinayət törətmiş şəxslərin 68 faizi heç yerdə işləməyən və oxumayan, 28,4 faizi əvvəllər də cinayət məsuliyyətinə cəlb olunmuş şəxslər, 2,2 faizi qadınlar, 0,2 faizi 14-17 yaşlı uşaqlar, 8,8 faizi 18-24 yaşlı, 17,8 faizi 25-29 yaşlı gənclər, 73,2 faizi 30 və yuxarı yaşlı şəxslərdir”.
