Sərmayənin mənbəyi, istiqaməti
2020-ci ilin yanvar-iyul aylarında Azərbaycanda iqtisadi və sosial sahələrə 7 milyard 588,3 milyon manat, əvvəlki ilin eyni dövrü ilə müqayisədə 2,6 faiz çox vəsait yönəldilib. Novator.az-ın məlumatına görə, Dövlət Statistika Komitəsi bildirir ki, neft-qaz sektoruna investisiyalar 22,9 faiz artıb, digər sahələrə yönəldilən vəsait 9,6 faiz azalıb.
Hesabata əsasən, ümumi sərmayənin 67,3 faizi məhsul istehsalı sahələrinin, 23 faizi xidmət sahələrinin, 9,7 faizi yaşayış evlərinin tikintisinin payına düşüb.
Sərmayədə dövlət sektorunun payı 40,3 faizi, qeyri-dövlət sektorunun payı 59,7 faiz göstərilir.
Qeyd olunur ki, daxili mənbələrdən yönəldilmiş vəsaitin dəyəri ümumi sərmayənin 61,8 faizini təşkil edib, müəssisə və təşkilatların vəsaitləri 4 milyard 533 milyon manat, büdcə vəsaitləri 1 milyard 666,7 milyon manat, bank kreditləri 466,3 milyon manat, əhalinin şəxsi vəsaitləri 440,8 milyon manat, sair vəsaitlər 319,9 milyon manat, büdcədənkənar dövlət fondlarının vəsaitləri 161,6 milyon olub.
Rəsmi açıqlamaya görə, yeddi ayda sərmayənin 53,7 faizi sənaye, 21,4 faizi tikinti, 12 faizi nəqliyyat və anbar təsərrüfatı sahəsində fəaliyyətə sərf edilib.
Xarici müəssisə və təşkilatlar əsas kapitala 2 milyard 895,8 milyon manat vəsait qoyduğu vurğulanır: investisiyanın 87,6 faizi Böyük Britaniya, ABŞ, Türkiyə, Yaponiya, İsveçrə, Malayziya, Norveç, Rusiya və İran sərmayədarlarına məxsusdur.
