Peşə Təhsilinin İnkişafı Fondu nə iş görəcək?
Nazirlər Kabineti Təhsil Nazirliyinin tabeliyində Peşə Təhsilinin İnkişafı Fondunun yaradılmasına qərar verib. Publik hüquqi şəxs olan fondun işçilərinin say həddi 9 ştat vahidi müəyyən edilib.
Novator.az bildirir ki, nizamnaməsinə görə, Peşə Təhsilinin İnkişafı Fondu peşə təhsili sahəsində gəlir və xərclərin şəffaf, səmərəli və mərkəzləşdirilmiş qaydada idarə olunmasını və Təhsil Nazirliyinin tabeliyindəki peşə təhsili müəssisələri arasında ədalətli bölgüsünü təmin edir, peşə təhsili sahəsinin inkişafına dəstək göstərir.
Bakı şəhərində yerləşən fondun fəaliyyət istiqamətləri belə sıralanır: peşə təhsili sahəsinin inkişafına maddi yardım göstərmək; peşə təhsili sahəsində gəlirləri peşə təhsili müəssisələrinin maddi-texniki bazalarının möhkəmləndirilməsinə yönəltmək; peşə təhsilinin inkişafı ilə bağlı dövlət siyasətinin formalaşdırılmasında və həyata keçirilməsində iştirak etmək; peşə təhsilinin inkişafını təşviq edən mexanizmlərin hazırlanmasında və həyata keçirilməsində iştirak etmək; peşə təhsili müəssisələrində maliyyə vəziyyətini təhlil etmək; peşə təhsili müəssisələrinin gəlirlərinin stimullaşdırılması üzrə təkliflər vermək; peşə təhsili müəssisələrində çalışan təhsilverənlərin maddi və sosial rifahının yüksəldilməsi və müvafiq meyarlar əsasında mükafatlandırılması üzrə tədbirlər görmək; peşəyönümü işlərinin aparılmasında peşə təhsili müəssisələrinə dəstək vermək.
Fondun idarəetmə orqanı İdarə Heyətidir. İdarə Heyəti 3 nəfərdən – təhsil nazirinin təyin etdiyi sədrdən, onun müavinindən və digər bir üzvdən ibarətdir.
Qurumun nizamnamə fondunun məbləği 1 milyon manatdır.
