İnvestisiya Holdinqinə rəhbər təyin olundu
Mətin Balasən oğlu Eynullayev Azərbaycan İnvestisiya Holdinqinin İdarə Heyətinin sədri təyin edilib. Prezident İlham Əliyev sərəncamı avqustun 19-da imzalayıb.
Novator.az bildirir ki, 1975-ci il təvəllüdlü Mətin Eynullayev Bakı Dövlət Universitetinin hüquq fakültəsini bitirib.
“Azleks” beynəlxalq hüquq firmasında, Əmək və Əhalinin Sosial Müdafiəsi Nazirliyində, İqtisadi İnkişaf Nazirliyində, “İçərişəhər” Dövlət Tarix-Memarlıq Qoruğu İdarəsində məsul vəzifələr tutub.
Təhsil Nazirliyi Aparatının rəhbəri, təhsil nazirinin müavini, vergilər nazirinin müavini olub.
Azərbaycan İnvestisiya Holdinqi prezidentin 7 avqust fərmanı ilə yaradılıb. Publik hüquqi şəxs olan Azərbaycan İnvestisiya Holdinqi onun idarəetməsinə verilmiş dövlət şirkətlərinin və müəssisələrinin, dövlət payı olan təsərrüfat cəmiyyətlərinin vahid prinsiplər əsasında idarə edilməsi, fəaliyyətinin təkmilləşdirilməsi, o cümlədən həyata keçirdikləri investisiya proqramlarının şəffaflığının və iqtisadi səmərəsinin yüksəldilməsi, onların rəqabət qabiliyyətinin təmin olunması, maliyyə sağlamlığının və dayanıqlılığının yaxşılaşdırılması sahəsində fəaliyyət göstərəcək.
Qurumun Müşahidə Şurasına baş nazir sədrlik edir.
