İlqar Məmmədov yenə sədr seçildi
Avqustun 18-də Respublikaçı Alternativ Partiyasının (REAL Partiya) Siyasi Komitəsinin iclası keçirilib. İclasda təşkilati məsələyə baxılıb və İlqar Məmmədov yenidən partiya sədri seçilib.
Novator.az bildirir ki, REAL Partiya 2018-ci ildə Respublikaçı Alternativ Hərəkatının bazasında yaradılıb, ancaq dövlət qeydiyyatına alınmaq üçün Ədliyyə Nazirliyinə müraciət etməyib.
Hökumət qurumları yer ayırmadığı üçün partiyanın təsis qurultayı 2018-ci il aprelin 7-də internetlə keçirilib, nizamnamə, proqram və atributlar qəbul edilib, seçki komissiyası formalaşıb. Aprelin 8-də isə təşkilatın Bakıdakı ofisində gizli səsvermə yolu ilə partiyanın sədri, Məclisin sərbəst üzvləri, Nəzarət-Təftiş Komissiyası seçilib.
Sədr postunu o zaman həbsdə olan İlqar Məmmədov tutub.
2019-cu il noyabrın 3-də REAL Partiyanın Məclisi növbədənkənar qurultay qərarı verib. Növbədənkənar qurultay sədr İlqar Məmmədovun təklifi olub, o, partiyanın strukturunu yeniləmək, bunun üçün nizamnaməni dəyişmək təşəbbüsü irəli sürüb.
2020-ci il avqustun 4-də REAL Partiya internet vasitəsilə təsis qurultayı keçirib. Qurultayda partiyanın nizamnaməsi və proqram sənədləri, atributları qəbul olunub, Siyasi Komitə seçilib, bu quruma partiya sədrini seçmək səlahiyyəti verilib.
1970-ci il təvəllüdlü İlqar Məmmədov Moskva Dövlət Universitetinin tarix fakültəsini bitirib, Budapeştdə yerləşən Mərkəzi Avropa Universitetində siyasi elmlər üzrə magistr dərəcəsinə yiyələnib. Beynəlxalq Valyuta Fondu və Dünya Bankının Bakı nümayəndəliklərində, ABŞ-ın Azərbaycandakı səfirliyində çalışıb. Beynəlxalq Böhran Qrupunun Azərbaycanda təmsilçisi, Avropa Şurasının Siyasi Biliklər Proqramının Azərbaycan üzrə direktoru olub. 5 il Milli İstiqlal Partiyası sədrinin müavini postunu tutub, 2008-ci ildə REAL Hərəkatını yaradaraq ona rəhbərlik edib.
2013-cü il fevralın 4-də, İsmayıllıda hökumət əleyhinə iğtişaşlar (23-24 yanvar 2013-cü il) təşkil etmək ittihamı ilə tutulub, 2018-ci il avqustun 13-dək həbsdə yatıb.
Ali Məhkəmənin Plenumu 2020-ci il aprelin 23-də İlqar Məmmədova bəraət verib.
