Sərhədçilər mükafatlandırıldı
Prezident İlham Əliyev Dövlət Sərhəd Xidmətinin hərbi qulluqçularına ali hərbi rütbələr verilməsi barədə sərəncam imzalayıb. Novator.az-ın məlumatına görə, general-mayorlar Araz Məmməd oğlu Məmmədov, Firuz Böyükağa oğlu Şirinzadə, Niyaməddin Məhərrəm oğlu Tağıyev general-leytenant hərbi rütbəsi, polkovniklər Aqşin Ramiz oğlu Məhərrəmov, Müzəffər Ələsgər oğlu Pirizadə general-mayor hərbi rütbəsi alıb.
Başqa bir sərəncamla tibb xidməti polkovnik-leytenantı Hacıyeva Tünzalə Əşir qızına əməkdar həkim, baş gizir Ələkbərzadə Rəna Kamil qızına əməkdar tibb işçisi fəxri adı verilib.
Bir qrup sərhədçi isə 2-ci dərəcəli “Vətənə xidmətə görə” ordeni, 3-cü dərəcəli “Vətənə xidmətə görə” ordeni, “Vətən uğrunda” medalı, “İgidliyə görə” medalı, “Hərbi xidmətlərə görə” medalı ilə təltif olunublar.
2002-ci ildə yaradılmış Dövlət Sərhəd Xidmətinə general-polkovnik Elçin Quliyev rəislik edir.
1967-ci il təvəllüdlü Elçin Quliyev 27 mart 2001-ci ildə milli təhlükəsizlik nazirinin müavini-Sərhəd Qoşunlarının komandanı təyin edilib. 31 iyul 2002-ci ildən Dövlət Sərhəd Xidmətinin rəisi-Sərhəd Qoşunlarının komandanı olub.
2017-ci il iyunun 5-də Dövlət Sərhəd Xidməti rəisindən Sərhəd Qoşunlarının komandanı statusu alınıb.
