İşçi, pensiyaçı, göstəricilər…
2020-ci il avqustun 1-nə Azərbaycanda iqtisadi fəal əhalinin sayı 5 milyon 230,1 min nəfər, onların 4 milyon 881,5 min nəfəri məşğul şəxslər olub. Novator.az-ın məlumatına görə, hesabatı yayan Dövlət Statistika Komitəsi muzdla işləyənlərin sayını 1 milyon 695,1 min nəfər göstərir: iqtisadiyyatın neft-qaz sektorunda 34,1 min nəfər, başqa sahələrində 1 milyon 661 min nəfər çalışıb.
Hesabata əsasən, ilin ikinci rübünün sonuna ölkə ərazisində 1192 nəfər əcnəbi işçi qeydə alınıb.
Yarım ildə ölkədə 84,8 min yeni iş yerinin açıldığı, 5,9 min iş yerinin bağlandığı, yanvar-iyul aylarında əhalinin nominal gəlirlərinin əvvəlki ilin eyni dövrünə nisbətən 0,2 faiz artdığı bildirilir.
Qeyd olunur ki, iyulun 1-nə ölkədə 1 milyon 257,4 min nəfər pensiyaçı qeydiyyata alınıb, aylıq pensiyaların orta məbləği 297,9 manata çatıb.
Rəsmi açıqlamaya .əsasən, yanvar-iyul aylarında kənd təsərrüfatı istehsalı əvvəlki ilin müvafiq dövrü ilə müqayisədə 2 faiz, o cümlədən heyvandarlıq məhsulları üzrə 3,2 faiz, bitkiçilik məhsulları üzrə 0,7 faiz artıb.
Yük və sərnişin daşımalarının ötən ilin yeddi ayına nəzərən 14,3 faiz və 31,6 faiz azaldığı vurğulanır.
Hesabata görə, ötən ilin yeddi ayı ilə müqayisədə informasiya və rabitə sahəsində göstərilmiş xidmətlərin dəyəri real ifadədə 3 faiz artıb, ictimai iaşə dövriyyəsi 3,7 dəfə, ödənişli xidmətlərdən əldə olunan gəlir 22,2 faiz azalıb.
