Xarici ticarətin 7 ayı
Yeddi aylıq xarici ticarət statistikası açıqlanıb. Novator.az bildirir ki, Dövlət Gömrük Komitəsinin hesabatına görə, 2020-ci ilin yanvar-iyul aylarında Azərbaycanın xarici ticarət əməliyyatlarının həcmi 15 milyard dolları ötüb, 9,1 milyard dollardan çox ixrac, 6 milyard dollara yaxın idxal qeydə alınıb.
172 ölkə ilə ticarət əməliyyatı aparıldığı, gömrük orqanlarının büdcəyə 2 milyard 360 milyon manatdan çox vəsait ödədiyi vurğulanır.
Statistikaya əsasən, ixracın 8,9 faizi MDB ölkələrinin, 49,9 faizi Avropa İttifaqı ölkələrinin, 41,2 faizi başqa ölkələrin payına düşüb.
İdxalda MDB-nin payı 25,9 faiz, Avropa İttifaqının payı 21,3 faiz, başqa ölkələrin payı 52,8 faiz göstərilir.
Yeddi ayda əsas tərəfdaş İtaliya olub, bu ölkə ilə ticarət ümumi dövriyyənin 21,1 faizi həcmində rəsmiləşib.
İxracda əsas ölkə İtaliya (32,1 faiz), idxalda Rusiyadır (18,3 faiz).
Hesabata görə, ixracın 88,6 faizi neft-qaz, 3,9 faizi meyvə-tərəvəzdir.
İdxalın 14,9 faizi yeyinti məhsulları kimi rəsmiləşib.
