ÜDM, sərmayə və sənaye hesabatı
2020-ci ilin yanvar-iyul aylarında Azərbaycanda 40 milyard 8,5 milyon manatlıq, əvvəlki ilin eyni dövrü ilə müqayisədə 2,8 faiz az ümumi daxili məhsul (ÜDM) istehsal olunub. Novator.az-ın məlumatına görə, hesabatı yayan Dövlət Statistika Komitəsi bildirir ki, iqtisadiyyatın qeyri neft-qaz sektorunda əlavə dəyər 1,6 faiz, neft-qaz sektorunda 4,5 faiz azalıb.
Əhalinin hər nəfərinə düşən ÜDM 4015,1 manat göstərilir.
Başqa bir hesabata əsasən, yanvar-iyul aylarında əsas kapitala 7 milyard 588,3 milyon manat məbləğində, 2019-cu ilin yeddi ayı ilə müqayisədə 2,6 faiz çox vəsait yönəldilib. Neft-qaz sektoruna yatırılmış investisiyaların həcminin 22,9 faiz artdığı, qeyri neft-qaz sektoruna yönəldilən vəsaitin həcminin 9,6 faiz azaldığı vurğulanır.
Dövlət Statistika Komitəsi həmçinin qeyd edir ki, sənaye müəssisələri və bu sahədə fəaliyyət göstərən fərdi sahibkarlar yanvar-iyul aylarında 21,6 milyard manatlıq və ya 2019-cu ilin eyni dövrü ilə müqayisədə 2,7 faiz az sənaye məhsulu istehsal edib, neft-qaz sektorunda məhsul istehsalı 4,3 faiz düşüb, qeyri neft-qaz sektorunda 13 faiz yüksəlib.
