Büdcə və neftin qiyməti yeniləndi
Prezident İlham Əliyev 2020-ci ilin dövlət büdcəsinə dəyişiklikləri imzalayıb. Novator.az bildirir ki, yenilənən büdcədə gəlirlər 24 milyard 124 milyon manat, xərclər 27 milyard 492,2 milyon manat olub.
Qanuna əsasən, büdcə gəlirlərinin 12,2 milyard manatı Dövlət Neft Fondundan köçürmənin, 7,2 milyard manatı Dövlət Vergi Xidmətindən, 3,8 milyard manatı Dövlət Gömrük Komitəsindən daxilolmaların, 804 milyon manatı büdcə təşkilatlarının büdcədənkənar daxilolmalarının, 100 milyon manatı başqa gəlirlərin payına düşür.
Sənəddə ümumi dövlət xidmətlərinin xərcləri 3 milyard 839,7 milyon manat, müdafiə və milli təhlükəsizlik xərcləri 3 milyard 804,1 milyon manat, sosial müdafiə və sosial təminat xərcləri 3 milyard 237 milyon manat, təhsil xərcləri 3 milyard 34,7 milyon manat, səhiyyə xərcləri 1 milyard 716,5 milyon manat, məhkəmə hakimiyyəti, hüquq mühafizə və prokurorluq sisteminin xərcləri 1 milyard 936,7 milyon manat göstərilir.
Yenilənən dövlət büdcəsində bir barrel neftin qiyməti 55 dollardan 35 dollara düşüb. Azərbaycan nefti “AzəriLayt”ın barreli yanvara 70,04, fevrala 62,15, marta 53,77, aprelə 19,43, maya 22,92, iyuna 38,14, iyula 43,02, avqusta 44,36 dollarla başlayıb.
Xam neft hasilatı yanvarda 678 min barrel, fevralda 667,4 min barrel, martda 683,7 min barrel, apreldə 679,8 min barrel, mayda 557,2 min barrel, iyunda 553,8 min barrel, iyulda 554,1 min barrel həcmində rəsmiləşib.
Beynəlxalq razılaşmaya görə, avqustdan Azərbaycanın gündəlik xam neft hasilatı 587 min barrel olmalıdır.
