Naxçıvan: yüksəliş və geriləmə statistikası
Novator.az yerli Dövlət Statistika Komitəsinə istinadla Naxçıvan Muxtar Respublikasının sosial-iqtisadi göstəricilərini təqdim edir.
Rəsmi hesabata görə, 2020-ci ilin yanvar-iyul aylarında muxtar respublikada 1 milyard 574,2 milyon manatlıq ümumi daxili məhsul istehsal olunub, bu da 2019-cu ilin eyni dövrünə nəzərən müqayisəli qiymətlər üzrə 0,6 faiz çoxdur.
Adambaşına ümumi daxili məhsul 3420,9 manat göstərilir.
2019-cu ilin yeddi ayına nəzərən sənayedə 0,9 faiz, kənd təsərrüfatında 3,5 faiz (hər ikisində müqayisəli qiymətlər üzrə), sərmayə qoyuluşunda 1,3 faiz, informasiya və rabitə xidmətlərində 3,2 faiz yüksəlişin qeydə alındığı vurğulanır.
Qeyd olunur ki, nəqliyyat sektorunda yük daşınması ötən ilin yeddi ayına nəzərən 1,3 faiz, pərakəndə əmtəə dövriyyəsi 1,1 faiz, əhaliyə göstərilən ödənişli xidmətlər 2,1 faiz (hər ikisi müqayisəli qiymətlər üzrə) geriləyib.
2019-cu ilin yanvar-iyul ayları ilə müqayisədə xarici ticarət dövriyyəsində 1,4 faiz, ixracda 0,7 faiz, idxalda 6,2 faiz artımın qeydə alındığı bildirilir.
Hesabata əsasən, iyulun 1-nə muxtar respublika iqtisadiyyatında bir işçiyə hesablanmış orta aylıq əməkhaqqı 524,8 manat olub.
