İnvestisiya Holdinqinin Müşahidə Şurası təsdiqləndi
Prezident İlham Əliyev Azərbaycan İnvestisiya Holdinqinin Müşahidə Şurasının tərkibini təsdiqləyib. Baş nazirin sədrlik edəcəyi Müşahidə Şurasının üzvləri bu vəzifələri tutan şəxslərdir:
prezidentin köməkçisi, Prezidentin Administrasiyasının iqtisadi məsələlər və innovativ inkişaf siyasəti şöbəsinin müdiri
prezidentin köməkçisi, Prezident Administrasiyasının iqtisadi siyasət və sənaye məsələləri şöbəsinin müdiri
iqtisadiyyat naziri
maliyyə naziri.
Sərəncam avqustun 12-də imzalanıb.
Azərbaycan İnvestisiya Holdinqi prezidentin 7 avqust fərmanı ilə yaradılıb. Publik hüquqi şəxs olan Azərbaycan İnvestisiya Holdinqi onun idarəetməsinə verilmiş dövlət şirkətlərinin və müəssisələrinin, dövlət payı olan təsərrüfat cəmiyyətlərinin vahid prinsiplər əsasında idarə edilməsi, fəaliyyətinin təkmilləşdirilməsi, o cümlədən həyata keçirdikləri investisiya proqramlarının şəffaflığının və iqtisadi səmərəsinin yüksəldilməsi, onların rəqabət qabiliyyətinin təmin olunması, maliyyə sağlamlığının və dayanıqlılığının yaxşılaşdırılması sahəsində fəaliyyət göstərəcək.
Qurumun Müşahidə Şurası ictimai (ödənişsiz) əsaslarla çalışacaq.
Nizamnaməyə görə, qurumun 5 nəfərlik İdarə Heyəti olacaq. İdarə Heyətinin sədrinin təyinatı və vəzifədən götürülməsi prezidentin səlahiyyətindədir. Üzvlərdən biri eyni zamanda baş icraçı direktor postunu tutacaq. Baş icraçı direktoru və İdarə Heyətinin digər üzvlərini sədrin təqdimatı əsasında Müşahidə Şurası vəzifəyə təyin və vəzifədən azad edəcək.
