Bakıda yeni taksilər
Nəqliyyat, Rabitə və Yüksək Texnologiyalar Nazirliyi yanında Bakı Taksi Xidmətinin 100 ədəd “London taksi”si xidmətə hazırdır. AZƏRTAC xəbər verir ki, prezident İlham Əliyev avqustun 12-də yeni taksilərlə tanış olub.
Taksilərin 6 nəfərlik müştəri salonu var.
Arayışa görə, yeni taksilər yanacaq əvəzinə elektriklə işləyir: “Avtomobillər həm ev şəraitində, həm də xüsusi quraşdırılmış məntəqələrdə cərəyanla təmin oluna bilər, 130 kilometrə qədər sırf elektriklə çalışır, sonra rejimin dəyişməsi mümkündür.
Smart texnologiyaların geniş tətbiq edildiyi avtomobil özü yoldakı sürət həddi barədə sürücünü xəbərdar edir. Sürücü idarəetməni itirdikdə və ya yol trayektoriyasını dəyişdikdə xüsusi sensorlar ona məlumat ötürür.
Avtomobillərdə USB portlar, “Wi-Fi” və GPS quraşdırılıb. Sürücü ilə sərnişin arasında əlaqəni minimuma endirmək üçün şüşə arakəsmə mövcuddur. Kabinədə sürücü ilə əlaqə üçün xüsusi mikrofon, görmə qüsurlu sərnişinlər üçün brayl əlifbası ilə idarəetmə paneli, eşitmə əngəllilər üçün təlimat lövhəsi var. Avtomobil fiziki əngəllilər üçün pandusla təchiz edilib. Bu taksilərdə ödənişi pos-terminal vasitəsilə də həyata keçirmək mümkün olacaq.
Taksilər “Android” sistemi ilə təchiz edilib. Sürücülər bütün prosesi monitor vasitəsilə idarə edə bilir”.
