“Neftçi”, “Keşlə” və “Sumqayıt” mərhələ keçsə…
Avqustun 20-də UEFA Avropa Liqasının 2020-2021 mövsümü başlayır. Turnirdə tək oyunlardan ibarət beş (Çempionlar Liqasından köçən komandalar üçün üç) təsnifat raundu var. Azərbaycan təmsilçiləri “Neftçi”, “Keşlə” və “Sumqayıt” yarışa ilkin raunddan sonra, birinci mərhələdən (27 avqust) qoşulur. “Neftçi”yə bu mərhələdə Şimali Makedoniyadan “Şkupi” komandası, “Sumqayıt”a yenə həmin ölkədən “Şkendiya” komandası, “Keşlə”yə Albaniyadan “Laçi” rəqib olub. Azərbaycan təmsilçilərinin hamısı oyunu evdə keçirəcək.
Novator.az bildirir ki, Azərbaycan klubları ilk səddi yarsalar, ikinci raundda tanınmış komandalarla üz-üzə gələ bilərlər. Həmin mərhələdən turnirə qoşulacaq komandalar arasında “Tottenhem” (İngiltərə), “Volfsburq” (Almaniya), “Qranada” (İspaniya), “Milan” (İtaliya), “Reyms” (Fransa) var.
“Bazel” (İsveçrə), “Kopenhagen” (Danimarka), “Standard” (Belçika), “Reyncers” (Şotlandiya), “Rio Ave” (Portuqaliya), “Villem II” (Niderland) klubları da ikinci raundda yer alırlar.
Mərhələnin digər komandaları bunlardır: “Qalatasaray” (Türkiyə), “Slovan”, “Yablonets” (hər ikisi Çexiya), “Hayduk” (Xorvatiya), “Hartberq” (Avstriya), BATE (Belarus), “Dinamo” (Moskva, Rusiya), “Kolos” (Kovalyovka, Ukrayna).
