Sumqayıta Pirşağı yolu: əlavə qatarlar buraxılır
Xırdalan dairəsində dəmir yolu körpüsünün tikintisi müddətində Bakı-Pirşağı-Sumqayıt elektrik qatarı yeni cədvəllə hərəkət edəcək.
Azərbaycan Dəmir Yollarının mətbuat xidmətinin avqustun 7-də yaydığı məlumata görə, Bakı-Pirşağı-Sumqayıt istiqaməti üzrə işləyən elektrik qatarlarının sayı artır. Yeni hərəkət qrafikinə bir neçə reys əlavə olunub, bu da Bakıdan Sumqayıta və əks istiqamətdə sərnişin sıxlığını azaltmaq məqsədi daşıyır. Cədvəl avqustun 10-dan qüvvəyə minəcək.
Bakı-Sumqayıt avtomobil yolu genişləndirilir, Xırdalan dairəsində yerləşən dəmir yolu körpüsü sökülərək yenidən tikiləcək, bu səbəbdən Bakı-Xırdalan-Sumqayıt elektrik qatarı avqustun 10-dan noyabrın 10-dək hərəkətdə olmayacaq.
Körpünün tikintisi müddətində Sumqayıta gedən və ya oradan Bakıya gələn sərnişinlərin Pirşağıdan keçən elektrik qatarından istifadə edə biləcəyi açıqlanıb.
