Büdcə zərfi parlamentdən keçdi
Avqustun 7-də Milli Məclis 2020-ci ilin dövlət büdcəsinə dəyişiklikləri üçüncü – sonuncu oxunuşda qəbul edib. Novator.az bildirir ki, yeniliyə görə, dövlət büdcəsinin gəlirləri 24 milyard 124 milyon manat, xərcləri 27 milyard 492,2 milyon manat olur.
Layihədə ümumi dövlət xidmətlərinin xərcləri 3 milyard 839,7 milyon manat, müdafiə və milli təhlükəsizlik üzrə xərclər 3 milyard 804,1 milyon manat, məhkəmə hakimiyyəti, hüquq mühafizə və prokurorluq sisteminin xərcləri 1 milyard 936,7 milyon manat, təhsil xərcləri 3 milyard 34,7 milyon manat, səhiyyə xərcləri 1 milyard 716,5 milyon manat, sosial müdafiə və sosial təminat xərcləri 3 milyard 237 milyon manat göstərilir.
Qanuna əsasən, büdcə gəlirlərinin 12,2 milyard manatı Dövlət Neft Fondundan transfertin, 7,2 milyard manatı Dövlət Vergi Xidmətinin xətti ilə daxilolmaların, 3,8 milyard manatı Dövlət Gömrük Komitəsinin xətti ilə daxilolmaların, 804 milyon manatı büdcə təşkilatlarının büdcədənkənar daxilolmalarının, 100 milyon manatı sair gəlirlərin payına düşür.
Büdcə zərfinə daxil olan başqa sənədlər də dəyişikliklər var. Dövlət Neft Fondunun gəlirləri 7 milyard 342,6 milyon manat nəzərdə tutulur, xərcləri 12 milyard 410 milyon məbləğində rəsmiləşir.
Əmək və Əhalinin Sosial Müdafiəsi Nazirliyi yanında Dövlət Sosial Müdafiəsi Fondunun gəlirləri və xərcləri 4 milyard 784,7 milyon manat, işsizlikdən sığorta fondunun gəlirləri və xərcləri 151,2 milyon manat olur.
