5 kürsü boşdur
2020-ci il fevralın 9-da seçilmiş parlamentin hazırda 120 deputatı var.
1991-ci ildə müstəqilliyini bərpa etmiş Azərbaycanda 2020-ci ilədək beş parlament seçkisi olub: 1995-ci il noyabrın 12-də, 2000-ci il noyabrın 5-də, 2005-ci il noyabrın 6-da, 2010-cu il noyabrın 7-də, 2015-ci il noyabrın 1-də.
Altıncı parlament seçkisi 2020-ci il noyabrın 1-də keçirilməli idi. 2019-cu il dekabrın 5-də prezident İlham Əliyev Milli Məclisi buraxaraq 2020-ci il fevralın 9-na növbədənkənar parlament seçkisi təyin edib.
9 fevral seçkisi 125 dairədə keçirilib. Mərkəzi Seçki Komissiyasının qərarları ilə 33 saylı Xətai, 35 saylı Xətai, 74 saylı Lənkəran kənd və 80 saylı İmişli-Beyləqan dairələri üzrə nəticələr ləğv olunub, parlament 121 nəfərlə fəaliyyətə başlayıb.
116 saylı Qəbələ dairəsindən partiyasız deputat Fəttah Heydərov avqustun 4-də vəfat edib və Milli Məclis üzvlərinin sayı 120-yə düşüb.
Novator.az bildirir ki, prezident İlham Əliyevin sədrlik etdiyi Yeni Azərbaycan Partiyası parlamentdə 70 deputatla təmsil olunur.
Vətəndaş Həmrəyliyi Partiyasının 3, Respublikaçı Alternativ Partiyası, Demokratik İslahatlar Partiyası, Böyük Quruluş Partiyası, Bütöv Azərbaycan Xalq Cəbhəsi Partiyası, Ana Vətən Partiyası, Milli Cəbhə Partiyası, Vəhdət Partiyası, Vətəndaş Birliyi Partiyası, Demokratik Maarifçilik Partiyasının hərəyə 1 mandatı var.
Respublikaçı Alternativ Partiyası və Milli Cəbhə Partiyasının dövlət qeydiyyatı yoxdur.
38 deputat partiyasızdır.
Qanuna görə, dairə üzrə seçki etibarsız sayılarsa və ya onun yekunları təsdiq edilməzsə, təkrar seçki keçirilir.
Deputat mandatının boş qalmasından sonra isə bir ay müddətində əlavə seçki təyin edilməlidir.
Həm təkrar, həm də əlavə seçki barədə qərarı prezident verir.
