Paytaxtda orta maaş 984 manata çatıb
Bakı Şəhər Statistika İdarəsi yeni göstəricilər açıqlayıb. Novator.az bildirir ki, rəsmi hesabata görə, 2020-ci ilin yanvar-iyun aylarında paytaxt sənayesində 14,8 milyard manatlıq, əvvəlki ilin ilk yarısı ilə müqayisədə 1,8 faiz az sənaye məhsulu istehsal edilib.
Yarım ildə əsas kapitala 4 milyard 62,7 milyon manat məbləğində, 2019-cu ilin eyni dövrü ilə müqayisədə 3,7 faiz çox vəsait yönəldildiyi vurğulanır.
Açıqlamaya əsasən, 2019-cu ilin yanvar-iyun aylarına nəzərən pərakəndə ticarət şəbəkəsi 1 faiz, geriləyib, əhaliyə göstərilən ödənişli xidmətlərdən gəlir 22,3 faiz azalıb.
İstehlak məhsullarının və xidmətlərin 2019-cu ilin yanvar-iyun ayları ilə müqayisədə 2,6 faiz bahalaşdığı qeyd olunur: ərzaq məhsulları, içkilər və tütün məmulatlarının qiymətləri 4,9 faiz, qeyri-ərzaq mallarının qiymətləri 0,9 faiz, əhaliyə göstərilən ödənişli xidmətlərin qiymətləri 1,1 faiz yüksəlib.
İctimai iaşə dövriyyəsinin real ifadədə azalması 50,6 faiz göstərilir.
İyunun 1-nə şəhərdə muzdla işləyənlərin orta aylıq nominal əməkhaqqının 984 manata çatdığı bildirilir.
