Məhkəmə imtina qərarını qüvvədə saxladı
Bakı Apellyasiya Məhkəməsi avqustun 6-da AXCP sədri Əli Kərimlinin və həyat yoldaşı Samara Seyidovanın şikayəti üzrə qərar çıxarıb. Şikayət Nəsimi Rayon Məhkəməsinin qərardadından verilmişdi.
Bakının Süleyman Rəhimov küçəsində yaşayan Əli Kərimli bu il aprelin 13-dən internet və rabitə problemi yaşayır. Onun evində, özünün və həyat yoldaşının mobil telefonlarında internet söndürülüb, telefon rabitələri kəsilib.
İctimaiyyətin və beynəlxalq dairələrin etirazlarına baxmayaraq problem həllini tapmır.
Əli Kərimli və Samara Seyidovanın mobil telefon nömrələri “Azercell” şirkətinə aiddir, internet üçün isə “AzQTel” MMC-nin xidmətindən istifadə olunub. Onlar hər iki şirkətdən Nəsimi Rayon Məhkəməsinə şikayət edərək Nəqliyyat, Rabitə və Yüksək Texnologiyalar Nazirliyinin, Daxili İşlər Nazirliyinin, Dövlət Təhlükəsizliyi Xidmətinin, Dövlət Mühafizə Xidmətinin də prosesə cəlb olunması istəyiblər. Şikayət ərizəsində Avropa İnsan Hüquqları Konvensiyası ilə verilmiş bir çox hüququn pozulduğu iddia olunub.
Nəsimi Rayon Məhkəməsi şikayətə baxmaqdan imtina edib. “Turan”ın məlumatına görə, avqustun 6-da Bakı Apellyasiya Məhkəməsi həmin imtinadan şikayəti təmin etməyib, rayon məhkəməsinin qərardadını qüvvədə saxlayıb.
1965-ci il təvəllüdlü Əli Kərimli milli azadlıq hərəkatının öncül şəxslərindəndir. Əbülfəz Elçibəyin prezidentliyi zamanı (1992-1993) əvvəl Prezident Aparatının şöbə müdiri, sonra dövlət katibi vəzifəsində çalışıb.
1993-cü ildən AXC sədrinin siyasi məsələlər üzrə müavini, daha sonra AXCP sədrinin birinci müavini olub. 1995 və 2000-ci illərdə Milli Məclisin deputatı seçilib. 2000-ci ildən AXCP-yə rəhbərlik edir. 2013-cü ildə yaradılmış Demokratik Qüvvələrin Milli Şurasının Koordinasiya Mərkəzinin üzvüdür.
AXCP sədri təcridetmə əməliyyatından yazıb
Əli Kərimli yenə internetsiz qalıb
Əli Kərimlinin müsahibəsi ünvana çatmayıb
Əli Kərimli yenə rabitəsiz qalıb
