İctimai birlik dənizçilərə müraciət edib
Dənizçilərə Sosial Dəstək İctimai Birliyi müraciət yayıb.
Dənizçilərə ünvanlanan müraciətdə deyilir ki, ictimai birlik iki aya yaxındır fəaliyyət göstərir: “Bu vaxta qədər bir neçə layihə hazırlanıb və ölkəmizdə fəaliyyət göstərən dənizçilik şirkətlərinə göndərilib.
Onlarla təklif almışıq. Dəvət etdiyimiz mütəxəssislər həmin təkliflərlə bağlı işlər görürlər. Sözsüz ki, gələn təkliflərin, göndərilən müraciət və ərizələrin təyinatı üzrə olmayanları da var. Amma biz “Uman yerdən küsərlər” deyimini də unutmuruq. İşimizi elə qurmaq istəyirik ki, bizdən umduqları qədər də razı qalsınlar. Şəxsi intriqaların, obyektivlikdən uzaq müraciətlərin edilməsi ürəkaçan deyil.
Yaxınlarda dünyanın bir çox şirkətləri ilə əlaqələr yaradacağıq. Onlarla tanışlıq və niyyət anlaşması imzalayacağıq. Hansı ölkədə və hansı şirkətdə çalışmalarına baxmayaraq bütün Azərbaycan dənizçilərinə dəstək olacağımızı, onların hüquqlarını qoruyacağımızı bildirəcəyik. Artıq bu istiqamətdə işlr aparılır. İşimiz çətin olacaq.
Bugünlərdə Dənizçilərə Sosial Dəstək İctimai Birliyinin sədri Faiq Balabəyli, sədr müavini, Dövlət Dənizçilik Akademiyasının baş müəllimi Hüseyn Məmmədov (Hüseyn Sözlü), ictimai birliyin maliyyə departamentinin rəhbəri İlham Qəhrəmanov, birliyin mətbuatla iş üzrə mütəxəssisi Fərrux Həmidli, birliyin dəstəyi ilə yayımlanan Mustaqil.az saytının redaktoru Tural Səfərlinin iştirakı ilə iki dəfə toplantı keçirilib. Hər iki toplantıda görüləcək işlər və dənizçilərimizin sosial həyatlarının yaxşılaşdırılması istiqamətində təkliflər müzakirə edilib”.
Müraciətin sonunda bildirilir: “Əziz dənizçilər, bizə ünvanlanacaq təklif və iradlarınızı, müraciətlərinizi [email protected] elektron poçt ünvanına göndərə bilərsiniz”.
