190 manat ödənişinə 53 milyon manat ayrılıb
Əmək və Əhalinin Sosial Müdafiəsi Nazirliyinin məlumatına görə, sərt xüsusi karantin rejiminin tətbiq olunduğu Bakı, Cəlilabad, Gəncə, Masallı, Mingəçevir, Sumqayıt, Yevlax şəhərləri və Abşeron, Bərdə, Goranboy, Göygöl, Xaçmaz, Salyan rayonları üzrə rəsmi yaşayış minimumu həcmində – 190 manat birdəfəlik ödəmə proqramı həyata keçiriləcək. Qərar layihəsi Nazirlər Kabinetinə təqdim olunub.
Ödəmənin aprel-may ayları üzrə onlayn müraciətində qeyd etdiyi faktiki yaşayış ünvanı Bakı, Cəlilabad, Gəncə, Masallı, Mingəçevir, Sumqayıt, Yevlax şəhərləri və Abşeron, Bərdə, Goranboy, Göygöl, Xaçmaz, Salyan rayonları olan 278 min şəxsi əhatələyəcəyi, bu məqsədlə 53 milyon manat vəsait sərf olunacağı bildirilir.
İşsiz və koronavirus pandemiyasına görə tətbiq olunan xüsusi karantin rejimi üzündən işini itirən şəxslər aprel-may aylarında 190 manat məbləğində birdəfəlik ödəmə alıb.
İyun ayında Bakı, Sumqayıt, Gəncə, Lənkəran, Yevlax, Masallı, Cəlilabad, Goranboy, Göygöl, Mingəçevir, Bərdə, Xaçmaz, Samux, Siyəzən, Şəki üzrə 190 manatlıq ödəniş həyata keçirilib.
Novator.az bildirir ki, dövlət qurumlarından bu ödənişləri alan işsiz şəxslərə birdəfəlik ödəmə düşmür:
– ünvanlı dövlət sosial yardımı alan ailələrin üzvlərinə;
– əmək pensiyaçılarına;
– aylıq müavinət alanlara;
– aylıq təqaüd alanlara;
– özünüməşğulluğun təşkili proqramı çərçivəsində əmlak verilmiş şəxslərə;
– işsizlikdən sığorta ödənişi alanlara;
– peşə hazırlığına görə təqaüd alanlara;
– 2020-ci ildə kənd təsərrüfatı üzrə subsidiya almış şəxslərə;
– əri və ya arvadı sahibkar olanlara (aktiv VÖEN-i olan) və ya rəsmi aktiv əmək müqaviləsi bildirişi olanlara;
– əri və ya arvadı ünvanlı dövlət sosial yardımı və 2020-ci ildə kənd təsərrüfatı üzrə subsidiya alan şəxslərə.
