AZƏRTAC prezident İlham Əliyevin bölgə səfəri ilə bağlı yeni məlumatlar yayıb. İyulun 29-u Şəkidə koronavirus xəstələrinin müalicəsi üçün nəzərdə tutulan modul tipli xəstəxananın istifadəyə verildiyi bildirilir. Xəstəxana 100 palatadan və 200 çarpayı yerindən ibarətdir.

İlham Əliyev xəstəxana ilə tanışlıqdan sonra həkimlərlə görüşüb.

Həmin gün dövlət başçısı Qəbələdə də modul tipli xəstəxana kompleksinə baş çəkib. Məlumat verilib ki, kompleksdə orta ağırlıqlı simptomları olan koronavirus xəstələrinin qəbulu və müalicəsi aparılacaq.

Ölkədə bu tipli daha 8 tibb ocağı var. Onların üçü Bakıda, qalanları Sumqayıt, Abşeron rayonu, Gəncə, Qobustan, İsmayıllıda fəaliyyət göstərir.

Baş nazir Əli Əsədov Nazirlər Kabinetinin 15 iyul iclasında deyib ki, koronavirus xəstələri ölkənin 35 şəhər və rayonunda yerləşən 50 xəstəxanada müalicə alırlar.

2019-cu ilin dekabrında Çində üzə çıxaraq dünyanı bürüyən koronavirus xəstəliyinə Azərbaycanda ilk yoluxma bu il fevralın 28-də qeydə alınıb. Nazirlər Kabineti yanında operativ qərargah iyulun 29-da yoluxanların ümumi sayını 31 min 221 nəfər göstərib: onların 438-i dünyasını dəyişib, 6288-i aktiv xəstədir.