Ədliyyə Nazirliyi iyulun 29-da keçirilmiş kollegiya iclası barədə rəsmi bilgi yayıb. Video formatlı iclasda çıxış edən ədliyyə naziri Fikrət Məmmədov deyib ki, 2020-ci ilin ilk yarısında 1210 normativ hüquqi akt layihəsi hazırlanıb, 1160-dək akt hüquqi ekspertizadan keçirilib, E-qanun.az və Huquqiaktlar.gov.az saytlarına 2 minə yaxın sənəd daxil edilib.

Hesabata görə, ilk yarım ildə 1,8 milyona yaxın notariat hərəkəti rəsmiləşdirilib, vətəndaşlıq vəziyyəti aktlarının dövlət qeydiyyatı ilə bağlı 133 mindən çox əməliyyat aparılıb, bu əməliyyatlarla bağlı 3,5 milyon manata yaxın vəsait, daşınmaz əmlakla əlaqədar müqavilələr üzrə 16 milyon manatadək vergi dövlət büdcəsinə köçürülüb.

Yanvar-iyun aylarında 73 qeyri-kommersiya qurumunun, 4 siyasi partiyanın dövlət qeydiyyatına alındığı, 30-dək mətbu nəşrin uçota götürüldüyü bildirilib. Qeyd olunub ki, qeyri-kommersiya təşkilatlarının ümumi sayı 4624-ə, mətbu nəşrlərin sayı 5343-ə yüksəlib.

Altı ayda 307 min icra sənədinin icrasının təmin edildiyi, hüquqi və fiziki şəxslərə 376 milyon manatdan çox vəsait ödətdirildiyi vurğulanıb.

Hesabata əsasən, yarım ildə məhkəmə qərarlarının icra olunmaması və digər cinayətlərlə bağlı 241 iş üzrə ibtidai istintaq tamamlanıb, fiziki və hüquqi şəxslərə vurulmuş 1,13 milyon manat məbləğində ziyan istintaqın gedişində ödətdirilib.

41 minə yaxın bələdiyyə aktına inzibati nəzarət qaydasında baxıldığı, 1000-dən çox aktın nazirliyin təklifləri əsasında ləğv edildiyi və ya dəyişdirildiyi, habelə qanunsuz verilmiş 3500 hektara yaxın torpaq sahəsinin geri qaytarıldığı qeyd olunub. Pozuntulara yol verən 53 bələdiyyə sədri barəsində inzibati xəta haqqında protokolların məhkəmələrə, cinayət xarakterli 20 fakt üzrə materialların prokurorluğa göndərildiyi bildirilib.

Prezidentin 6 aprel sərəncamı ilə 176 məhkumun əfv edildiyi xatırladılan iclasda o da vurğulanıb ki, qanunvericilikdəki yeniliklərin tətbiqi ilə 130 məhkum cəzadan azad olunub, 1250 nəfər vaxtından əvvəl azadlığa buraxılıb.

Novator.az bildirir ki, Ədliyyə Nazirliyi Azərbaycan Xalq Cümhuriyyəti yarandığı gün – 1918-ci il mayın 28-də təsis edilib.

1920-ci il mayın 13-də Ədliyyə Nazirliyi ləğv olunub, Xalq Ədliyyə Komissarlığı yaradılıb. 1930-cu ildə bu komissarlıq buraxılıb. 1933-1959-cu illərdə yenidən fəaliyyət göstərib.

27 oktyabr 1970-ci ildə Ədliyyə Nazirliyi təsis olunub.