Azərbaycanla Türkiyənin Quru Qoşunları və Hərbi Hava Qüvvələrinin iştirakı ilə keçiriləcək döyüş atışlı təlimlər barədə rəsmi məlumatlar yayılıb. Müdafiə Nazirliyi bildirir ki, birgə təlimlərə iki ölkənin ordularının şəxsi heyəti, zirehli texnikası, artilleriya qurğuları və minaatanları, həmçinin hərbi aviasiya və hava hücumundan müdafiə vasitələri cəlb edilir.

Təlimlər avqustun 1-dən 5-dək Quru Qoşunlarının da cəlb edilməsi ilə Bakıda və Naxçıvanda, hərbi aviasiya vasitələrinin iştirakı ilə isə iyulun 29-dan avqustun 10-dək Bakı, Naxçıvan, Gəncə, Kürdəmir və Yevlax şəhərlərində keçiriləcək.

İyulun 27-si Türkiyə Silahlı Qüvvələrinin şəxsi heyəti və hərbi texnikası Naxçıvana gələrək Əlahiddə Ümumqoşun Ordusunun hərbi hissəsində qərar tutub.

İyulun 28-də isə Türkiyə Silahlı Qüvvələrinin şəxsi heyətinin Bakıda təntənəli qarşılanma mərasimi olub.

Azərbaycanın bütün cənub-qərb bölgəsi (Xankəndi şəhəri, Şuşa, Xocalı, Laçın, Kəlbəcər, Qubadlı, Zəngilan rayonları tam, Xocavənd rayonu, keçmiş Ağdərə rayonu, Ağdam, Füzuli, Cəbrayıl rayonları qismən), eləcə də Qazax rayonunun 7, Sədərək rayonunun 1 kəndi Ermənistanın işğalı altındadır.