Məhbus cəbhəçinin gileyi
Bakı Apellyasiya Məhkəməsi məhbus cəbhəçi Telman Seyfullayevi azadlığa buraxmaqdan imtina edib.
Novator.az bildirir ki, 1962-ci il təvəllüdlü Telman Seyfullayev milli azadlıq hərəkatının fəalı, AXCP üzvüdür. İyulun 23-də Nəsimi Rayon Məhkəməsi Baş Prokurorluğun İstintaq İdarəsinin təqdimatına baxaraq onun barəsində 3 aylıq həbs qətimkan tədbiri seçib. İyulun 20-də tutulan cəbhəçi 14-15 iyul aksiyasında baş verənlərdə təqsirli bilinir.
Telman Seyfullayev iki övlad atasıdır. Qızı ailəlidir, oğlu ABŞ-da yaşayır.
Azadliq.org-un məlumatına görə, iyulun 28-də Bakı Apellyasiya Məhkəməsi Telman Seyfullayevin həbsindən verilmiş şikayətə baxıb. Telman Seyfullayev prosesə Bakı İstintaq Təcridxanasından onlayn qaydada qatılıb. O, günahsız olduğunu vurğulayıb, şikayətlərini dilə gətirib, sovqat qəbul edilmədiyi üçün tutulandan bəri paltarını dəyişə bilmədiyini, ailəsi ilə telefonla danışmağa imkan verilmədiyini deyib.
Vəkil Bəxtiyar Hacıyev Telman Seyfullayevin istintaq dövründə azadlıqda qalmasını istəyib, qeyd edib ki, cəbhəçinin həyat yoldaşı xərçəng xəstəsidir, hərəkət qabiliyyəti məhdud olan qadının yeganə qulluq edəni Telman Seyfullayev olub. Ancaq məhkəmə həbs qətimkan tədbirini qüvvədə saxlayıb.
İyulun 12-dən Ermənistan-Azərbaycan sərhədinin Tovuz sahəsində gedən döyüşlərdə Azərbaycan Ordusunun hərbi qulluqçuları və bir mülki şəxs şəhid olub.
İyulun 14-ü axşamdan paytaxt Bakıda Azərbaycan Ordusuna dəstək aksiyası keçirilib, “Qarabağa azadlıq” tələbləri səslənib. Aksiya iştirakçıları şəhərdə yürüş ediblər, sonra Şəhidlər xiyabanında və Milli Məclisin binası qarşısında toplaşıblar.
İyulun 15-nə keçən gecə bir qrup şəxs Milli Məclisin binasına girəndən sonra polis aksiyanı dağıdıb.
Baş Prokurorluqla Daxili İşlər Nazirliyinin iyulun 15-də yaydığı birgə məlumatda qeyd olunub ki, aksiyada 7 polis əməkdaşına müxtəlif dərəcəli bədən xəsarətləri yetirilib, 2 xidməti avtomobil aşırılaraq yararsız hala salınıb, daha 14 xidməti avtomobilə və toplantının keçirildiyi ərazinin yol infrastrukturuna ciddi ziyan vurulub.
Milli Məclis Aparatı parlamentin birinci mərtəbəsində bir sıra dağıntılar törədildiyini, mülkiyyətə və inventara ziyan vurulduğunu bəyan edib.
Bunun ardınca həbslər başlayıb. Barələrində həbs qətimkan tədbiri seçilən AXCP üzvləri Asif Yusifli, Seymur Əhmədov, Bəxtiyar İmanov, Ramid Nağıyev, İsmayıl Həsənov, Ayaz Məhərrəmli, Baba Süleyman, Ceyhun Novruzov, Məhəbbət Nağıyev, Telman Seyfullayev, Fuad Qəhrəmanlı zərərçəkmiş şəxsə külli miqdarda ziyan vurmaqla özgənin əmlakını qəsdən məhv etmə və ya zədələmə; ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə; hakimiyyət nümayəndəsinə qarşı müqavimət göstərmə və ya zor tətbiq etmədə ittiham olunurlar.
AXCP fəalı Elvin Məmmədov da həmin ittihamlarla cinayət məsuliyyətinə cəlb olunub, polisin nəzarətinə verilib.
Fuad Qəhrəmanlıya həmçinin hakimiyyətin zorla ələ keçirilməsinə yönələn hərəkətlər ittihamı irəli sürülüb.
Aksiya ilə bağlı cinayət işi açılıb
Cəbhəçilər tutulub. Əli Kərimlidən etiraz
Cəbhə: buraxılan və tutulanlar var
Aksiya məhbuslarının sayı artdı
Cəbhəçinin oğluna koronavirus işi açılıb
Cinayət işləri, inzibati cəzalar, naməlumlar
Telman Seyfullayevə cinayət işi, 3 aylıq həbs
Telman Seyfullayevin yoldaşı ağır xəstədir
Fuad Qəhrəmanlı da həbs edildi
