Orta pensiya nə qədərdir?
2020-ci il iyulun 1-nə Azərbaycanda pensiyaçıların sayı 1 milyon 260 min nəfər olub. Əmək və Əhalinin Sosial Müdafiəsi Nazirliyi bildirir ki, onların 736,9 min nəfəri yaşa, 380,9 min nəfəri əlilliyə, 142,2 min nəfəri ailə başçısını itirməyə görə pensiya alıb.
Hesabata əsasən, ilin ilk yarısında orta aylıq pensiya 2019-cu ilin eyni dövrünə nisbətən 27% artaraq 300 manata yaxınlaşıb.
Yaşa görə orta aylıq pensiyanın 330 manata yaxın olduğu vurğulanır.
Yanvar-iyun aylarında pensiyaçılara ödənən pensiya vəsaitlərinin məbləği 2 milyard 250 milyon manat göstərilir.
Novator.az bildirir ki, 2017-ci il iyulun 1-dək Azərbaycanda kişilər 63, qadınlar 60 yaşda pensiyaya çıxırdı. Həmin vaxtdan bəri yaş həddi artırılır. 2021-ci il iyulun 1-dək kişilərin, 2027-ci il iyulun 1-dək qadınların pensiya yaşı 65-ə çatacaq.
Əmək pensiyasının minimum məbləği 200 manatdır.
2020-ci ildən əmək pensiyasının sığorta hissəsi orta aylıq nominal əməkhaqqının illik artım tempinə uyğun, sığortaolunanların fərdi hesabının sığorta hissəsində qeydə alınan pensiya kapitalı isə istehlak qiymətləri indeksinin illik səviyyəsinə uyğun indeksləşdirilir.
İndeksləşdirmə Dövlət Statistika Komitəsindən Əmək və Əhalinin Sosial Müdafiəsi Nazirliyinə təqdim olunan rəsmi bilgi əsas götürülməklə həyata keçirilir.
Əmək pensiyasının sığorta hissəsi fərdi hesabın sığorta hissəsində qeydə alınmış pensiya kapitalının gözlənən pensiya ödənişi müddətinin aylarının sayına (144 ay) nisbəti şəklində hesablanan məbləğ, pensiya kapitalı fərdi hesabın sığorta hissəsində qeydə alınan və fərdi hesabın yığım hissəsində toplanan vəsaitlərin məbləğidir.
