Ali Məhkəmə məcburi müalicəni haqlı saydı
Ali Məhkəmə AXCP fəalı Aqil Hümmətovun şikayəti üzrə qərar çıxarıb.
Sosial şəbəkələrdə hakimiyyəti tənqid edən Aqil Hümmətov bu il martın 30-da tutularaq Bakının Maştağa qəsəbəsindəki 1 saylı Psixiatriya Xəstəxanasına salınıb. Aprelin 1-də Sabunçu Rayon Məhkəməsi onun ruhi xəstə olmadığını əsas gətirərək sərbəst buraxılmasına qərar verib. Ancaq aprelin 2-də Aqil Hümmətov yenidən tutulub, aprelin 3-də Bakı Apellyasiya Məhkəməsinin qərarı ilə həmin xəstəxanaya yerləşdirilib və iyulun 2-dək orada saxlanıb.
Fəal özü və partiyadaşları məhkəmənin məcburi müalicə barədə qərarını siyasi sifariş kimi qiymətləndirib.
Azadliq.org-un məlumatına görə, iyulun 21-də Ali Məhkəmə Aqil Hümmətovun Bakı Apellyasiya Məhkəməsinin 3 aprel qərarından şikayətini təmin etməyib. Aprel ayında təqdim olunmuş şikayətdə Aqil Hümmətov psixiatriya xəstəxanasına yerləşdirilməsinin Avropa İnsan Hüquqları Konvensiyası ilə verilmiş işgəncəyə, ləyaqəti alçaldan, qeyri-insani rəftara məruz qalmamaq; azadlıq və toxunulmazlıq; ədalətli məhkəmə araşdırması; şəxsi həyata hörmət və ayrı-seçkiliyə məruz qalmamaq hüquqlarının pozuntusu kimi tanınmasını istəmişdi.
Aqil Hümmətovun vəkili Nemət Kərimli “Azadlıq” radiosuna deyib iş üzrə Avropa İnsan Hüquqları Məhkəməsinə şikayət verilib, icraat davam edir: “Ali Məhkəmənin qərarını da alıb Avropa Məhkəməsinə göndərəcəyik”.
Küçələrdən karton, tullantı yığmaqla ailəsini dolandıran Aqil Hümmətov sosial mediada yaydığı videolarda ölkədə sosial-iqtisadi durumun ağır olduğunu vurğulayaraq prezidenti və hökuməti tənqid etməsi ilə tanınıb.
