İyulun 20-də fərman imzalayan prezident İlham Əliyev Mədəniyyət Nazirliyinin əsasnaməsini yeniləyib. Novator.az-ın məlumatına görə, nazirin birinci müavinlərinin sayı birdən ikiyə çatdırılıb.
Dövlət başçısının eyni gündə verdiyi sərəncamlarla Anar Qabil oğlu Kərimov Azərbaycan Respublikasının YUNESKO yanında daimi nümayəndəsi vəzifəsindən geri çağırılaraq mədəniyyət nazirinin birinci müavini təyin edilib və ona nazirin vəzifələrini müvəqqəti icra etmək səlahiyyəti verilib.
Əvvəlki mədəniyyət naziri Əbülfəs Qarayev vəzifədən mayın 21-də çıxarılıb. 1956-cı il təvəllüdlü Əbülfəs Qarayev 1994-cü ildən gənclər və idman naziri, 2001-ci ildən gənclər, idman və turizm naziri; 2006-cı ildən mədəniyyət və turizm naziri postlarını tutub. Mədəniyyət naziri vəzifəsinə 2018-ci ildə təyinat almışdı.
